Qeshqer qaziriq déhqanlirining 3 neper wekili waqitliq nezerbend qilindi

Muxbirimiz qutlan
2014.03.27
dolet-zemin-bayliqi-nazariti-Qaziriq-dehqan-erz-305.jpg Uyghur aptonom rayonluq dölet zémin bayliqi nazaritining qaziriq déhqanlirining erzige bergen jawabi.
RFA/qutlan

Igilishimizche, qeshqer sheher nezerbagh yéza yuqiriqi qaziriq 14-kent déhqanlirining yer dewasi üchün méngiwatqan 3 neper wekili yéqinda xotendiki bir méhmanxanigha waqitliq solap qoyulghan.

25-Mart seherde téléfon ziyaritimizni qobul qilghan qaziriq kentide olturushluq bir déhqan ayal mezkur kenttiki jiddiychilikler heqqide uchur berdi. Uning bildürüshiche, 24-mart küni nezerbagh bazarliq saqchixana xadimliri yuqirining buyruqi boyiche, yer dewasi qiliwatqan qaziriq déhqanlirining 3 neper wekili - turghun mamut, memettursun abduwayit we abduqeyyum memet qatarliqlarni saqchi aptomobilida élip ketken.

Melum bolushiche, saqchilar bu 3 neper déhqanlar wekilini “Yéngi sheher tazghun'gha barisiler” dep élip ketken. Emma uzun ötmeyla ularning xoten'ge élip bérilip bir méhmanxanida nezerbend qilin'ghanliqi ashkara bolghan.

Ziyaritimizni qobul qilghan déhqan ayal, kent ahalisi arisida 26-mart küni ürümchidin tekshürüshke adem kélidighanliqi heqqide gep-sözlerning taralghanliqini, yerlik da'irilerning heqiqiy ehwalni yoshurush üchün 3 neper déhqanlar wekilini xoten'ge élip ketkenlikini bayan qildi.

Biz téximu ilgiriligen halda ehwal igilesh üchün déhqanlar wekili turghun mamutqa téléfon qilduq. U téléfonimizni qobul qilghan bolsimu, emma etrapida özini kontrol qilip turghan saqchilar bolghachqa tepsiliy sözlishishke jür'et qilalmidi we bashqa nomurgha téléfon qilishimizni eskertip téléfonni üzüwetti.

Biz shu boyiche ikkinchi qétim ulargha téléfon achtuq. Halbuki, etrapida ularni béqip turghan saqchilar bolghachqa déhqanlar wekili turghun mamut bu qétimmu éniq gépini déyelmidi.

Biz 26-mart seher üchinchi qétim ulargha téléfon qilduq. Téléfonni déhqanlar wekilliridin abduqeyyum memet aldi. U etraptiki saqchilarning nazariti astida sorighan so'allirimizgha nahayiti éhtiyat bilen jawab berdi. U bizning xoten'ge némishqa élip bérilghanliqi heqqidiki so'alimizgha “Sayahet qilip qayttuq” dep jawab berdi we özining chet'ellik muxbirlar bilen sözlishelmeydighanliqini éytip téléfonni qoyuwetti.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.