Гума наһийисидә 3 аилә уйғурниң өй-җайи түзливетилгән, өй игилири таяқ йегән

Мухбиримиз қутлан
2014-05-21
Share
guma-nahiyesi-oy-cheqish.jpg Қурулуш ширкити билән наһийәлик шәһәр қурулуш идариси тәрипидин бир кечидә чеқилип түзливетилгән наһийә базирида олтурушлуқ уйғур тиҗарәтчиниң шәхсий өй-җайи. 2014-Йили май, гума.
Oqurmenler Teminligen

Ичишимизчә, гума наһийә базириниң гүлқазма мәһәллисидә олтурушлуқ 3 аилә уйғурниң өй-макани бир кечидә чеқилип түзливетилгән. Наһийәлик шәһәр қурулуш идариси билән қурулуш ширкити бирликтә зорлуқ васитиси ишлитип, 2-айниң 26-күни кечидә өйләрни бузған. 3 Аилә уйғур тиҗарәтчиләрниң шәхсий өй-җайи вә дуканлири шуниңдәк кичик типтики завут әслиһәлири топа астида қәп қалған.

Өй-маканлиридин айрилған бу кишиләр гума наһийә вә хотән вилайитиниң мунасивәтлик орунлириға берип әрз қилған болсиму, уларниң дәвасини сорайдиған адәм чиқмиған. Қурулуш ширкити өткән йилидин буян бу 3 аилигә түрлүк бесимларни ишлитип, өй-җайини әрзан баһада сетип беришкә қистиған. Улар буни рәт қилғанда қурулуш ширкити адәм башлап келип өй игилирини қаттиқ урған вә тәһдит салған.

Йеқинда бу 3 аилә дәвагәрләрдин мәмәт абла радиомизға әһвал мәлум қилип, өзлири дуч кәлгән наһәқчиликләрни шикайәт қилди.

"мениң өйүм гума наһийәлик қатнаш бекитиниң удулидики оқ йолниң бойида иди. Бу йәрни адәттә гүлқазма мәһәллиси дәпму атайду. Мениң өй-җайимниң орни 200 квадрат метирдин ашиду. Туралғу өйүм вә иҗаригә бериватқан бирқанчә дуканлирим бар иди. Өткән йилидин башлап қурулуш ширкити мән вә мениң қошнилиримниң өй-җайлириға көзи чүшүп, бу җайға йеңи аһалиләр олтурақ бинаси салимиз дегили турди. Биз уларға әмисә бизгә бинадин бир йүрүштин өй, дуканлиримизниң орниға дукан бериңлар, андин өй-җайимизни өткүзүп берәйли десәк унимиди. Шуңа бизму уларниң йолсиз тәлипини рәт қилдуқ."

"мениң хотән шәһиридә шәхсий шипаханам бар. Бу йилниң бешида шипаханида ишләвататтим. Туюқсиздин қурулуш ширкитиниң хоҗайини наһийәлик шәһәр қурулуш идарисиниң 4 нәпәр хадимини башлап ишханамға үсүп кирди. Улар өй-җайиңни немишқа сетип беришкә унимайсән дәп нәқ мәйданда мени уруп кәтти. Қулақ түвимгә тәгкән бир мушт зәрбисидин һошумдин кетиптимән."

У сөзини давамлаштуруп мундақ деди:
"мән һошумға келип гумиға қайтип шәһәр қурулуш идарисигә берип әрз қилдим. Улар уқушмаслиқ бопту дәп рәсмийәт йүзисидин мән билән сөһбәтләшкән болди вә ағзаки кәчүрүм сориди. Әмма өйүмни әрзан баһада сетип беришкә давамлиқ мәҗбурлиди. Мән рәт қилдим. Ахирида бу йилниң 26-феврал күни кечә саәт 12 дә улар топа иттириш машиниси вә бирқанчә йәр қазғучи машинилар билән келип өйлиримизни түртүп түзливәтти. Мән у чағда хотәндә идим. Балилиримму өйдә йоқ иди. Улар мушу пурсәттин пайдилинипту. Һәтта яндики қошнимизниң өйидә 11 җан адәм ухлаветиптикән, уларни өй билән қошуп бастурувәткили тас қапту. Улар дәрһал сақчиға телефон қиптикән, сақчилар нәқ мәйданға келип уларни тохтатқан охшайду."

Мәмәт абла ахирида мунуларни билдүрди:
"мениң пүтүн мал-мүлкүм бузуветилгән өйниң топа-кесәклири астида қалди. Қошнимизниң завут вә дуканлириму топа астида қалди. Бизниң һечнемимиз қалмиди. Әрз қилип бармиған ишикимиз қалмиди. Хотән вилайәтлик әрзийәт ишханиси бу ишни тәкшүрүп бир тәрәп қилиш тоғрилиқ алақә чүшүргән болсиму, лекин қурулуш ширкити билән шәһәр қурулуш идариси писәнт қилмиди. Мал баһа идариси таш-топа вә кесәкләр арисидин илғап алған мал-мүлкүмни аран 15 миң йүән һесаблиди. Әслидә өйүмдә 60 миң сомдин артуқ қиммәттики мал-мүлкүм бар иди. Қурулуш ширкити өйимизни чеқип болуп, андин баһа қоюпту. Улар мениң 200 квадрат метирдин артуқ өй-җайимға 80 миң сом пул беримиз дәпту. Улар бизниң өй-җайимизниң орниға салидиған бинадики һәр бир йүрүш өйни 300 миң сомға сатидикән. Шундақ болғанда, мән йәнә уларға 220 миң сом пул төләп аран бир йүрүш өй алалайдикәнмән. Бу зораванлиққа немә дегүлүк!"

Ахирида у йәнә мунуларни билдүрди:
"һазир өй-макансиз қалдуқ. Аялим анисиниң өйидә, мән ата-анамниң өйидә туруватимән. Һөкүмәткә әрзан баһалиқ иҗарә өй тепип бериңлар дәп барған болсақму, лекин һәл болмиди. Әмди немә қиларимизни, нәгә берип әрз қилишимизни билмидуқ."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт