Йилқичидики қанлиқ бастурушта 22 кишиниң өлгәнлики вә 4 кишиниң тутулғанлиқи айдиңлашти

Мухбиримиз шөһрәт һошур
2013.08.27
Share on WhatsApp
Share on WhatsApp
qaghiliq-pidaiylar-hujum-305.jpg Хәритидә “28‏-феврал вәқәси” йүз бәргән қағилиқниң орни көрситилгән. 2012-Йили 28-март
AFP

Қағилиқниң йилқичи йезисида йүз бәргән хитай сақчилириниң уйғур яшлирини террорлуқ гумани билән оққа тутуш вәқәсидә гумандарлардин 22 нәпириниң өлгәнлики вә 4 нәпириниң тутқун қилинғанлиқи айдиңлашти. Бу һәқтә мухбиримизға мәлумат бәргән йилқичи йезилиқ сақчиханиниң ярдәмчи сақчиси аңлиғиниға асасән гумандарлардин 15 кишиниң өлгәнликини паш қилған иди.

Бүгүн мухбиримизниң телефониға җаваб бәргән йезилиқ ислам җәмийитиниң мудири маһмутхан қарим диний затларға ечилған йиғиндин аңлиғанлириға асасән, вәқәдә гумандарлардин 22 кишиниң өлгәнликини вә җәсәтләрниң қара тағарға қачилинип намәлум бир җайға йөткәп кетилгәнликини паш қилди. Йәнә мәлум болушичә, мәзкур сайлиққа орунлашқан гумандарлар йәрлик амма тәрипидин паш қилинған болмастин, бәлки хитай тәрәп тик учар айропилан билән көзитиш елип бериш арқилиқ байқап қалған. Төвәндә мухбиримиз шөһрәт һошурдин бу һәқтә тәпсилий мәлумат аңлайсиләр:

Соал: сиз йилқчи 9 - кәнтниң имами маһмутхан қарим боламсиз?

Җаваб: шундақ, мән шу.

Соал: һазир мәсчитләрдә немиләр һәққидә сөзләватисиз?

Җаваб: шу муқимлиқ, милләтләр иттипақлиқи дегәндәк.

Соал: бу мушу қетим вәқә чиққандин кейин елип бериливатқан тәшвиқатларму?

Җаваб: шундақ. Бизгә аммини партийиниң яхши сияситиниң қәдригә йетишкә йетәкләңлар дәп йиғин ачти, шу бойичә тәшвиқат елип бериватимиз.

Соал: йиғинда вәқә һәққидә немиләр дейилди?

Җаваб: 22си етиветилди, 4 тутулди дәп шундақла уқтурди, тәпсилатини бәк сөзләп кәтмиди.

Соал: бу санни қайси башлиқ деди?

Җаваб: диний ишларға мәсул йеза башлиқи алим һамидин деди.

Соал: җәсәтләр қандақ бир тәрәп қилинпту?

Җаваб: 22 җәсәтни қара тағарға солап әкитипту, нәгә әкәткинини йеза башлиқлириму билмәйдикән.

Соал: вәқә йүз бәргән қандақ бир орун?

Җаваб: поскам билән қағилиқниң арисидики бир сайлиқ. Шу сайлиқниң бойидики бир өйдә йүз берипту.

Соал: вәқәни сақчилар қандақ байқап қапту, амма паш қилған әһвал бармикән?

Җаваб: вәқәниң алдида бир һәптидәк болған бир айропилан бәкрәк учуп юргән, бәзидә пәс, бәзидә егиз. Йиғинда дейилишичә, шу айропилан көзитиш арқилиқ байқап қапту. Андин әһвал вилайәт, аптоном районларға мәлум қилинип, буйруқ бойичә бу иш бопту.

Соал: бундин аввалму мушундақ айропилан көзитидиған ишлар болғанму?

Җаваб: яқ.

Соал: вәқәдә өлгәнләр кимләр икән?

Җаваб: 4 нәпири бизниң йезидин икән. Шахап йезисидин көпрәккән дәп аңлидуқ.

Соал: мәмәт әмәй дегән бирсиниң инисиниң бу вәқәгә четилғанлиқи һәққидә гәп бар....

Җаваб: шундақ, нураһмәт әмәй. У шу йәрдин йәр һөддә алған. Шуниң өйидә балилар топлинип бир ишларни қиливатқан икән.

Соал: вәқә йүз бәргәндин кейин силәргә қандақ тапшуруқ берилди?

Җаваб: аммини тәрбийиләш, йочун адәмләрни көзитип мәлум қилиш қатарлиқ ишлар тапшурулди.

Соал: сизниң имамлиқтин башқа вәзипиңизму барму?

Җаваб: 2001 - йилдин башлап йезилиқ ислам җәмийитиниң мудиримән. 3 Қетим наһийә тәрипидин бәштә яхши имам болуп тәқдирләндим.

Һөрмәтлик радио аңлиғучилар, юқирида йилқичида юз бәргән қанлиқ вәқә һәққидә толуқлима мәлуматлар аңлаттуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.