Xitay saqchiliri tutqundiki naxshichi zahir shahning amérikidiki akisini özliri bilen “Hemkarlishish” qa dewet qilghan

Muxbirimiz shöhret hoshur
2019.01.25
zahirshah-abduwaris.jpg Ahirshah we akisi abduwaris ata-anisi bilen birge.
Social Media

Atushta lagérda solinip yatqan talantliq naxshichi zahir shahning amérikida yashawatqan akisi abduwaris ötkende radiyomiz ziyaritini qobul qilip, tutqundiki inisi we ata-anisi heqqide melumat bergen idi. Melum bolushiche, xitay saqchiliri abduwaris bilen alaqiliship, uni özliri üchün xizmet qilishqa dewet qilghan we shundaq qilsa uning a'ile ehwaliningmu yaxshilinidighanliqini éytqan. Saqchilar söhbet dawamida abduwaristin “Erkin asiya radi'osi” we dunya Uyghur qurultiyi heqqide uchur élishqa urun'ghan bolsimu, emma abduwaris ularning bu telipini keskinlik bilen ret qilghan. Buning bilen xitay saqchiliri abduwarisqa özlirining konkrét teleplirini otturigha qoyalmighan.

Hörmetlik radi'o anglighuchilar, nöwette amérikida yashawatqan abduwaris ablimit tutqundiki inisi zahirshah, dadisi ablimit we anisi buxelchemlerning lagérdiki ehwalini bilish üchün atushtiki saqchi orunlirigha téléfon qilghan. Saqchilar abduwarisning ata-anisi we qérindishigha bolghan méhri we mes'uliyetchanliq tuyghusini bir ajizliq dep perez qilip uni özliri bilen hemkarlishishqa dewet qilghan.

Abduwaris teminligen awaz xatiriside munular bayan qilin'ghan: “Sen u ismi ulugh erkin asiya radiyosi, shiwéyxuy )dunya Uyghur qurultiyi( dégenlerge egeshme, ularning wezlirige ishinip ketme, bizge yéqin tur, kommunistik partiyining illiqliqini hés qil. . . . . Awwal sen manga özüngning meydanini - wetenpewerlikingni körsitip baq, bir jungxu'a puqrasi, bir atush puqrasi we bir süntaghliqtek ish qip baq, etrapingdiki düshmenlerning uchurini yetküzüp bérip baq, emma tedbirge diqqet qil, andin men sen dégen ishni qilip bérey. . . . . .”

Abduwarisning bayan qilishiche bu atushtiki süntagh saqchixanisining bashliqining sözliri bolup, u buning bilen sözliship bir hepte kéyin, memtili isimliki yene bir xadim uning bilen alaqileshken. Abduwaris türkiyede ikenlikini perez qiliwatqan bu xadimmu abduwarisni yaxshi bir “Jungxu'a puqrasi” bolushqa dewet qilghan. Amérika we türkiye üstidin shikayet qilghan shundaqla xitayning Uyghur rayonida tesis qilghan yighiwélish lagérlirini aqlighan. 

Birqanche aydin béri a'ile ezalirining lagérda ikenlikini xelq'ara axbaratlargha ashkarilap kéliwatqan abduwaris ata-anisi we qérindishi zahir shahning ehwalidin toluq xewer tépish we xelq'ara axbaratni zörür pakitlar bilen teminlesh meqsitide xitay saqchiliridin melumat sorighan. Xitay terep abduwarisqa hemkarlishish shertini qoyghandin kéyin, u bu telepke keskin we qattiq inkas qayturghan. Abduwaristin kütken netijige érishelmigen xitay saqchiliri bir heptidin béri uning bilen alaqe qilishni toxtatqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.