Tijaretchi abduwaris ablimit: "Naxshichi inim zahirshah ablimit bilen ata-anam atushtiki lagérda"

Muxbirimiz shöhret hoshur
2018-12-10
Élxet
Pikir
Share
Print
Tijaretchi abduwaris ablimit (solda) we uning lagérgha tashlan'ghan naxshichi inisi zahirshah ablimit (ongda).
Tijaretchi abduwaris ablimit (solda) we uning lagérgha tashlan'ghan naxshichi inisi zahirshah ablimit (ongda).
Social Media


2005‏-Yilidin étibaren hijret hayati bashlan'ghan, qirghizistanda 10 yil, türkiyede ikki yil réstoran achqan we nöwette amérikida yashawatqan tijaretchi abduwaris ablimit özining naxshichi inisi zahirshah ablimit bilen dadisi ablimit we apisi buxelchemning bir yildin béri atushtiki yighiwélish lagérida ikenlikini ashkarilidi. Muxbirimizning ziyaritini qobul qilghan atushtiki saqchi xadimliri zahir shah ablimitning ehwali heqqide melumat bérishtin özlirini qachurdi.

Tor arxipliridin melum bolushiche, naxshichi zahirshah ablimit 2006‏-yillardin bashlap "Güli rena", "Ana", "Janan'gha söz" qatarliq xelq naxshilirini wayigha yetküzüp orundap, xelq arisida dang chiqarghan. U 2015‏-yilliq "Yipek yoli sadasi" naxsha musabiqiside ikkinchi derijilik mukapatqa érishken.

Bu yil birinchi aydin bashlap sehnidin ghayib bolghan zahirshah ablimit heqqide uning amérikida yashawatqan akisi abduwaris ablimit mundaq deydu: "Inim, dadam we apam ücheylen 2015‏-yili türkiyege sayahetke kelgen idi. Inim wetende aldin pilanlan'ghan sen'et pa'aliyetliri seweblik türkiyede besh künla turghandin kéyin weten'ge qaytti. Apam bilen dadam 4 aydin kéyin qaytti. Bultur yil béshidin bashlap, ular bilen alaqem pütünley üzüldi. Bu yil birinchi ayda inim we ata-anamning tutqun qilin'ghanliqini uqtum, emma her üchilisi siyasiy pa'aliyetlerdin uzaq bolghini üchün az mezgildin kéyin qoyuwétilidu dep oylidim, emma bir ayning aldida ularning téxiche lagérda ikenlikidin xewer taptim. . ."

Biz zahirshah ablimit we uning ata-anisining ehwali heqqide melumat élish üchün atushtiki alaqidar saqchixanilargha téléfon qilduq. Saqchi xadimlirining bezliri zahirshah ablimitni tonumaydighanliqini éytti. Bezi xadimlar zahirshah ablimitning ehwalidin xewersizlikini, yene beziler bolsa özlirining bu heqte melumat bérelmeydighanliqini tilgha aldi. Zahirshah ablimitning nopusi turushluq süntagh yéziliq saqchixana xadimi zahirshah ablimitning tutqunda ikenlikini jem'iyettin anglighanliqini, emma bu heqte resmiy idare-organlar teripidin melumat bérilmigenlikini otturigha qoydi.

Nöwette amérikida yashawatqan abduwaris ablimit inisi zahirshah ablimit we ata-anisining tutqun qilinishigha ularning türkiye sepirining bahane qilin'ghanliq éhtimalliqini otturigha qoydi. Abduwaris inisi we ata-anisining lagérda ikenlikini dunyagha bildürüsh we bu arqiliq yighiwélish lagérlirining weziyitini dunyagha ashkarilash üchün a'ile boyiche heriketke ötkenlikini, yeni qirghizistanda yashawatqan ayalining qirghizistanda, özining bolsa amérikida heriket bashlighanliqini we bu yoldin chékinmeydighanliqini bildürdi.

Toluq bet