Ötken ayda radiyomizgha kelgen we ürümchidin yollan'ghanliqi bildürülgen bir mektupta, pichan nahiye lemjin yéza 10-kent 3-mehelle ezasi 35 yashliq ghalipjanning ötken yili 8-ayning 21-küni lagérda ölgenliki melum qilin'ghanidi.
Muxbirimizning élip barghan téléfon ziyaretliri dawamida, ghalipjanning lagérda wezipe ötewatqan bir mest saqchi teripidin urup öltürülgenliki ashkarilandi.
Mezkur inkaschining bayan qilishiche, ghalipjanning lemjin baziri 10-kent, 3-mehelliside olturushluq anisi 2018-yili 8-ayning 21-küni lagér bashqurghuchiliridin oghlining doxturxanida ölgenliki heqqide uqturush alghan. Ghalipjanning uruq-tughqanliri shu küni kech sa'et 6:30 mezgilide doxturxanigha barghinida, ghalipjanning köksige yürek qozghatquch qoyulghan halettiki jesitini körgen. Da'iriler ulargha ghalipjanning yoshurun yürek késili barliqi, lagérda bu késilining qozghilip qalghanliqi, doxturxanigha ekélin'gende qutquzush ünüm bermey jan üzgenlikini bildürgen. Emma da'iriler ulargha ghalipjanning yüz-közi we bedinining köksidin bashqa qismini körsetmigen.
Téléfonimizni qobul qilghan, lemjin baziridiki bir saqchi xadimi ghalipjanning ölümi heqqidiki so'alimizgha jawab bérishtin özini tartti we bu heqte sheherlik saqchi idarisidin melumat élishimizni tewsiye qildi. Sheherlik saqchidiki bir xadimmu, ghalipjanning ölümi heqqide melumat bérishni ret qildi. Emma lemjindiki ahalilerdin biri bu mehellide ötken yili lagérda ölüp ketken ghalipjanning a'ilisining ayaq mehellide olturushluq ikenlikini ashkarilidi. Ayaq mehellidiki bir kent kadiri
Lagérda ölgen ghalipjanning dadisining ismining exmetjan ikenliki we 1-mehellige nopusluq ikenlikini bayan qilghan bolsimu, uning sewebi heqqide melumat bérelmidi.
Inkasta, ghalipjanning 35 yashlar chamisida ikenliki, 5 yashliq bir balisi barliqi yézilghan we ghalipjanning jesitining kent kadirliri we saqchilar teripidin shu küni kéchilep yerlikke qoyuwétilgenliki, méyitning yuyulishighimu ruxset qilinmighanliqi yézilghan. Téléfon ziyaretlirimiz dawamida, 1-mehelle bashliqi, ghalipjanning lagérda wezipe ötewatqan bir saqchi xadimi teripidin soraqxanida urup öltürülgenliki, saqchi xadimi shu küni wezipe ötewatqanda éghir mest ikenlikini ashkarilidi. Bu mehelle bashliqining déyishiche, da'irilerning ghalipjanni urup öltürgen saqchi xadimini wezipe ötewatqan mezgilide haraq ichkenliki üchün belgilik derijide jazalighan. Emma bu saqchi xadimining kimliki we ghalipjanni öltürüp qoyush jeryani heqqide ghalipjanning a'ilisi we kent kadirlirigha melumat bermigen. .
Mezkur mehelle bashliqi jem'iyettin anglighanlirigha asasen, ghalipjanni urup öltürgen saqchining eslide emgek bilen özgertish meydanining saqchisi ikenliki we lagérgha waqitliq wezipe üchün kelgenliki hem milliti xitay ikenlikini bildürgen bolsimu, emma uning isim-familisini dep bérelmidi.
Hörmetlik radi'o anglighuchilar, yuqirida pichan lemjinlik ghalipjanning lagérdiki bir mest xitay saqchi teripidin urup öltürülgenliki heqqide anglitish berduq.
