Oqutquchi arslanning lagérda ölgenliki "Tik-tok" bétide ashkarilandi we da'iriler teripidin delillendi

Muxbirimiz shöhret hoshur
2019-08-23
Share
Arslan-Muyesser-01.jpg Lagérda jan üzgen ghulja sheher döngmehellilik yash oqutquchi arslanning repiqisi muyesser bilen birge chüshken süriti.
Social Media

Lagérda jan üzgen ghulja sheher döngmehellilik yash oqutquchi arslanning repiqisi muyesser xanim "Do'uyin" tor bétide paylashqan widéyo.

Mushu ayning 14-küni xitayche "Do'uyin" (tik-tok) tor bétidiki bir widiyoluq uchur we inkaslardin ghulja sheher döngmehellilik yash oqutquchi arslanning ikki kün awwal wapat bolghanliqi we lagérda jan üzgenlik éhtimalliqi ashkarilandi. Muxbirimizning ghulja shehiridiki alaqidar orunlargha qarita élip barghan téléfon ziyaretliri dawamida, arslanning ghulja sheher 5‏-bashlan'ghuch mektep oqutquchisi ikenliki we ölümidin burun lagérda ikenliki aydinglashti. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Mushu ayning 14-küni ijtima'iy axbarat wasitiliridin xitayning "Do'uyin" tor bétide muyesser isimlik bir ayal özining yoldishi bilen birge chüshken bir türküm xatire süretlirini tordashliri bilen ortaqlashqan. Tordashliri bu resimlerde ipadilen'gen güzel we romantik a'ile hayatini tebriklesh bilen birlikte, bu resimlerge kirishtürülgen mungluq muzika we muyesserning ghemkin qiyapitige qarita muyesserdin so'al sorighan. Muyesser bu so'allargha jawaben؛ "U bekla uzaq yerde, menggü körgini bolmaydighan" dep jawab yazghan. Tordashlardin yene biri: "Men sizning yoldishingizni tonuymen, uninggha néme boldi?" dep sorighan. Muyesser bu so'algha: "U wapat boldi" dep ochuq jawab bergen. Emma u: "Néme sewebtin?" dégen so'algha jawab qayturmighan. Inkaschilardin biri arslanning özining bashlan'ghuch mekteptiki xitay tili oqutquchisi ikenlikini yazsa؛ yene bir inkaschi arslanning ghulja sheher döngmehellelik ikenlikini bildürgen. Biz bu yip uchlirigha asasen, eng awwal ghulja sheher döngmehelle kocha bashqarmisigha téléfon qilduq we döngmehellidiki bashlan'ghuch mektepning namini sürüshte qilduq. Döngmehelle kocha bashqarma xadimi döngmehellide 5‏- we 20-bashlan'ghuchtin ibaret ikki bashlan'ghuch mektep we bir ottura mektep barliqini bildürdi. "Do'uyin" tor bétidiki yene bashqa inkaslarda arslanning kishilik pezilitige ixcham medhiyeler oqulghan we uninggha qisqa teziyeler bildürülgen. Emma arslanning ölüm sewebi heqqide héchkim inchikilep so'al soriyalmighan. Biz bu so'al-jawabtiki éhtiyatchanliq we nöwettiki Uyghur weziyitige asasen, arslanning lagérda ölgenlik éhtimalliqini perez qilduq we guman'gha asasen, mezkur xadimdin lagérda tügep ketken arslan isimlik oqutquchining esli qaysi mektepning oqutquchisi ikenlikini soriduq؛ u özining yéngi xizmetchi ikenlikini seweb körsitip, bu heqte melumati yoqluqini éytti. "Do'uyin" toridiki süret we körünüshtin arslanning 30 yashlar chamisida ikenliki we bir perzentning atisi ikenliki melum. Emma uning éniq xizmet orni melum emes. Téléfonimizni qobul qilghan ghulja sheherlik ma'arip idarisi xadimimu döngmehellidiki ikki bashlan'ghuch mekteptin qaysisida Uyghurlar barliqini sorighinimizda, u deslepte so'allirimizgha jawab bérishtin mumkin qeder özlirini tartti. Döngmehellide ikki bashlan'ghuch mektep barliqini we buning biri 5 ‏-bashlan'ghuch mektep ikenlikini tekrarlighan bir xadim terbiyileshte wapat bolghan arslanning qaysi mektepte ikenlikini sorighinimizda, ehwaldin xewersizlikini ensiz bir keypiyatta bayan qildi. 

Téléfonimizni qobul qilghan ma'arip idarisining yene bir xadimi, 5-bashlan'ghuch mektepte Uyghurlar bilen xitaylarning bille oquydighanliqini bildürüsh bilen birlikte, terbiyileshte tügep ketken oqutquchi arslanning burun qaysi mektepte ishligenlikini sorighinimizda: "5-Bashlan'ghuch mektepte" dep jawab berdi. Biz bu xadimdin arslanning lagérning ichide yaki lagérdin chiqip ölgenlikini sorighinimizda, u bu uchurni 5‏-bashlan'ghuch mektepke bérip mektep rehberliridin éniqlishimizni tewsiye qildi. Biz uningdin arslanning depne ishlirigha qaysi orunning mes'ul bolghanliqini sorighinimizda, u: "Elwette, döngmehelle saqchixanisi" dep jawab berdi. Döngmehelle saqchixana xadimi, terbiyileshte tügep ketken arslanning éniq wapat bolghan küni we sewebini sorighinimizda, u bu uchurlarni ashkarilashqa bolmaydighanliqini éytti. 

Hörmetlik radi'o anglighuchilar, "Do'uyin" toridiki mezkur uchurda arslanning shu kündin ikki kün burun yeni 12-awghust küni wapat bolghanliqi tilgha élin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet