Малайшия уйғурларни қоғлимаслиқта чиң туридиғанлиқини билдүргән

Малайшия парламенти хитайдин қечип кәлгән уйғурларни бейҗиң даирилири биваситә тәләп қилған тәқдирдиму һәргиз тапшуруп бәрмәйдиғанлиқини билдүргән.

“җәнубий хитай сәһәр почта гезити” ниң хәвәр қилишичә, малайшияниң уйғурларға тутқан позитсийәси малайшия баш вәзир башқармисидики министир моһид редзуан юсофниң бир парламент әзасиниң уйғурларни хитайға қайтуруп бериш һәққидики соаллириға қайтурған җавабида оттуриға қоюлған. 

Бу йил сентәбирдин буян мәхпий тутулған мәзкур җаваб малайшия парламентиниң тор бетидә елан қилинған.

Роейтерс агентлиқиниң нәқил қилишичә, моһид редзуан җавабида мундақ дегән: “әгәр уйғур мусапирлири малайшияға панаһлиқ тиләп кәлгән болса, малайшия хитай җумһурийитиниң тәлипи болған тәқдирдиму уйғур мусапирлирини қайтурмаслиқни қарар қилди.”

Малайшия ақиллар амбири-әмир тәтқиқат җәмийитиниң рәиси вә баш иҗраийә әмәлдари райс һүсәйин малайшияниң бу мәсилидә қәтий турғанлиқини махтиди.

Моһид редзуан малайшияниң перикатан насйонал һөкүмитиниң министири болуп, у бу йил февралниң ахирида махатир муһәммәд иттипақини сиясий өзгириш билән ағдуруп ташлиған.

Махатир баш вәзир болған мәзгилдә, 2018-йилидин бу йил февралғичә, хитайниң қайтуруп бериш тәлипигә писәнт қилмай, түрмидики 11 уйғурни қоюп бәргән. Бу һәрикәт хитайни ғәзәпләндүргәниди.