20 Йиллиқ кесилгән мәһмутҗан мәмәтниң корла түрмисидә еғир кесәл икәнлики дәлилләнди

Вашингтондин мухбиримиз шөһрәт һошур тәйярлиди
2023.10.23
mexmutjan-memet-kifaye-eksan-1.jpg Түркийәдә яшаватқан корлалиқ муһаҗир кифайә еһсан ханимниң корла түрмисидә җаза муддитини өтәватқан йолдиши мәхмутҗан мәмәт. (Орни вә вақти ениқ әмәс)
Kifaye Éhsan

Нөвәттә түркийәдә яшаватқан корлалиқ муһаҗир кифайә ханим, йеқинда корла түрмисидә җаза өтәватқан йолдиши мәхмутҗан мәмәтниң еғир кесәл икәнлики һәққидә учур алған вә йолдишиниң һаяти бихәтәрликидин қаттиқ әндишиләнгән. Мухбиримизниң корладики алақидар органларға қарита телефон зиярәтлири давамида, мәхмутҗан мәмәтниң саламәтликидә еғир мәсилә көрүлгәнлики дәлилләнди.

Нөвәттә түркийәдә 6 балиси билән бирликтә яшаватқан кифайә еһсан ханимниң радийомизға баян қилишичә, у пәрзәнтлирини оқутуш үчүн 2015‏-йили йолдиши мәхмутҗан мәмәт билән бирликтә түркийәгә кәлгән. Мәхмутҗан 2016‏-йили һәҗ сәпиридә түркийәгә кәлгән анисини юртиға апирип қоюш үчүн корлаға қайтқан вә қайтип барған һаман паспорти тартивелинған; 2017-йили тутқун қилинип кесиветилгән. Өткән йилидики ениқлашлиримизда, униң пиландин сирт пәрзәнт көргәнлики, пәрзәнтлирини динда оқутқанлиқи вә түркийә сәпири қатарлиқ сәвәбләр билән 20 йиллиқ кесилгәнлики дәлилләнгән иди. Кифайә ханимниң бу қетим радийомизға билдүрүшичә, у йеқинда йолдишиниң түрмидә җигәр кесилигә гириптар болғанлиқи вә бир қатар әгәшмә кесәлликләр билән һаятиниң хәвп астида қалғанлиқи һәққидә учур алған.

Телефонимизни қобул қилған корла шәһәрлик түрмә башқуруш идарисиниң бир хадими, мәхмутҗан мәмәтниң саламәтликидә еғир мәсилә көрүлгәнликидин хәвәр тапқанлиқи, әмма кесилиниң ениқ диягнозидин хәвәрсизликини ейтти.

Мәлум болушичә, кифайә ханим муһаҗирәттики барлиқ уйғурларға охшашла 2017-йилдин кейин уруқ-туғқанлири билән биваситә алақилишиш имканидин мәһрум қалған. Йолдишиниң кесили һәққидики бу әнсиз учур өзи вә пәрзәнтлирини пәришан қилған. Биз корладики мәзкур түрмә хадимдин мәхмутҗан мәмәтниң корладики аилә-тавабиатиниң мәхмутҗанниң саламәтлик мәсилисидин хәвири бар-йоқлуқи вә түрмә сиртида давалитишни тәләп қилған-қилмиғанлиқини соридуқ. Бу хадим, бу әһвалдинму хәвәрсизликини ейтти.

Кифайә ханимниң дейишичә, мәхмутҗан мәмәтниң тутқун қилиништин бурун саламәтликидә һечқандақ мәсилә йоқ болуп, корла шәһәрлик йеза-игилик идарисидики хизмитидин вақитлиқ тохтап сода-карханичилиқ билән шуғуллиниватқан икән. У тутқун қилинғандин кейин, униң игиликидики нәшпүт болиқи карханисиға қулуп селинған. Нәтиҗидә униң 6 қериндишиниң корладики аилилири вә өзиниң түркийәдики аилиси асаслиқ кирим мәнбәсидин айрилип қалған.

Телефонимизни қобул қилған корла түрмә дохтурханисиниң бир хадими, мәхмутҗан мәмәтниң җигәр кесили, йүрәк кесили вә қан бесим кесили қатарлиқ бирқанчә хил кесәлгә гириптар болғанлиқини һәмдә әһвалиниң еғирлиқини дәлиллиди.

Йолдишиниң саламәтликидә әслидә һечқандақ мәсилә йоқлуқини тәкитлигән кифайә ханим, хәлқарадики алақидар органларни йолдишиниң саламәтлик әһвалиға көңүл бөлүшкә вә хитай тәрәпкә бесим ишлитип, йолдишиниң түрмә сиртида давалинишиға ярдәм беришкә чақирди.

Илгирики ениқлашлиримизда мәхмутҗан мәмәтниң қериндашлири вә аписи болуп бир аилидин 7 киши кесиветилгәнлики дәлилләнгән; аписи 78 яшлиқ хәлчәм пазилниң бу йил санҗи түрмисидә еғир кесәл болғандин кейин давалиниш үчүн аилисигә қайтурулғанлиқи мәлум болған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.