“мән хитайниң лагеридин қечип чиқтим” намлиқ тез сизма китаб тарқилишқа башлиди
2024.02.15

Америкада турушлуқ лагер шаһити, паалийәтчи зумрәт давутниң һаяти тәсвирләнгән “мән хитайниң лагеридин қечип чиқтим” намлиқ тез сизма китаб нәшр қилинип, 13-февралдин башлап амазон арқилиқ тарқитилишқа башлиди. Китаб зумрәт давут һәққидә елан қилинған хәвәрләр вә зумрәт давутниң кишилик һоқуқ органлириға бәргән гуваһлиқлири вә униң ағзаки баянлири асасида аптор антони дел кол тәрипидин йезилған, китабтики рәсимләр сәнәткар фаһизә азим тәрипидин сизилған.
Бу мунасивәт билән китабтики баш персонаж зумрәт давут ханим радийомиз уйғур бөлүминиң мәхсус зияритини қобул қилип, китаб һәққидә мәлумат бәрди.
Зумрәт давут ханимниң билдүрүшичә, китабта униң уйғур диярида зор көләмлик тутқун башланған 2016-2017-йиллири тутқун қилинип, хитай һөкүмитиниң аталмиш “қайта тәрбийәләш” намидики йиғивелиш лагериға қамилиши, лагерда йолуққан ечинишлиқ қисмәтлири, пакистан гираждани болған ериниң пакистан әлчиханиси арқилиқ сүрүштүрүши нәтиҗисидә хитай лагеридин қутулуп пакистанға кетиш җәряни, униң пакистандин америкаға кәлгәндин кейин, бирләшкән дөләтләр тәшкилати кишилик һоқуқ комитетида бәргән гуваһлиқлири вә таратқуларда униң һаяти тоғрилиқ елан қилинған хәвәрләр сизма шәклидә сизип чиқилип, рәсимлик шәкилдә тәпсилий баян қилинған.
Зумрәт давут ханимниң билдүрүшичә, мәзкур китабниң йәнә 13 минутлуқ картон филим нусхисиму ишләнгән.
Мәзкур картон филим униң көрүшигиму әвәтип берилгинидә, у толиму һаяҗанланған.
Униң билдүрүшичә, у, филимни көргәндин кейин, хитайниң җаза лагериға қамалған өзигә охшаш уйғурларниң қисмәтлириниң бундақ бир усулда дуня җамаәтчиликигә тарқалғанлиқидин интайин мәмнун болған вә тәсирләнгән.
Мәзкур китаб 2022-йили америкада ахбарат-нәшриятчилиқ саһәсидики нопузлуқ мукапат “пулитзер мукапати” ға еришкән.
Зумрәт ханим өзиниң әйни чағда китабниң аптори антони дел кол тәрипидин мукапатлаш мурасимиға қатнаштурулғинида китабқа юқири баһалар берилгәнликини билдүрди.
Зумрәт ханимниң билдүрүшичә, 13-феврал китабниң амазон базириға селинғанлиқи һәққидә хәвәр тарқалғандин кейин, уйғурлар учраватқан ирқий қирғинчилиқ вәзийитидин хәвәрдар болған бир қисим америкалиқ паалийәтчиләр вә чәт әлләрдики уйғурлар өзигә вә китаб апториға телефон қилип, рәһмәт билдүргән.
Сөһбәтниң тәпсилатини юқириқи аваз улинишидин аңлайсиләр.