Хотән вә қәшқәрдә көп сандики мәсчит мунарлириниң чеқиветилгәнлики дәлилләнди

Мухбиримиз шөһрәт һошур
2019-06-17
Елхәт
Пикир
Share
Принт
Уйғур дияридики мунарлири билән һилал айлири чеқиветилгән бир мәсчитниң әсли вә һазирқи һалити.
Уйғур дияридики мунарлири билән һилал айлири чеқиветилгән бир мәсчитниң әсли вә һазирқи һалити.
Social Media

Мухбиримизниң уйғур райониға қарита елип барған телефон зиярәтлиридин ашкарилинишичә, хотән вә қәшқәрләрдә өткән йили юқиридин кәлгән бир уқтурушқа асасән мәсчитләрниң мунарлири билән һилал айлири «диний әсәбийликниң аламити» дәп қарилип, йеқинқи 2-3 ай ичидә асасән дегүдәк чеқиветилгән. Хотәндики бир кәнт секретари өзиниң чоңбазар алдидики бостан мәсчитиниң мунарисини чеқишқа қатнашқанлиқини тилға алди. Қәшқәрдики бир кәнт аяллар комитетиниң мудириму өз тәвәликидики мәсчит мунариниң чеқиветилгәнликини дәлиллиди.

Йеқинда муһаҗирәттики паалийәтчиләрдин асийә уйғурниң фейсбук бетидә уйғур райондики мәлум бир мәсчитниң буниңдин бир йил бурунқи вә нөвәттики сүрити селиштурулуп елан қилинди. Сүрәттин мәзкур мәсчитниң мунариниң бир йил аввал барлиқи, нөвәттә болса кесип чүшүрүветилгәнлики, йәни мунарниң пәқәт көтики қалғанлиқи ашкариланди. Америкадики паалийәтчиләрдин йәнә бәһрам синташниң мәхсус мәсчитләр һәққидики сүрәтләр топлимидиму уйғур дияридики зор бир түркүм мәсчитләрниң мунарилириниң кесиветилгәнлики көрситилгән. Биз бу учурларға асасән хотән вә қәшқәрдики бир қисим кәнт аһалиләр комитетиниң хадимлириға телефон қилип, уларниң тәвәликидики мәсчитләр мунарлириниң бар-йоқлуқи һәққидә мәлумат соридуқ. Телефонимизни қобул қилған бир кәнт секретари хотәндики мәсчитләрдә мунар вә һилал айниң асасән дегүдәк чеқилип яки кесилип болғанлиқини баян қилди. Униң дейишичә, даириләр мәсчит мунарлири билән һилал айни «диний әсәбийликниң аламити» дәп бекиткән. Қәшқәрдики бир кәнт аяллар комитетиниң мудириму өз тәвәликидә мәсчитләрниң чеқилип азайтилғанлиқини тилға елиш билән бирликтә қепқалған мәсчит мунарлириниң йиқитилғанлиқини дәлиллиди. 

Хотәндики мәзкур кәнт секретариниң ашкарилишичә, хотән чоң базар әтрапидики бостан мәсчитниң мунариму чеқиветилгән. Бу мәсчит мунарниң чеқилишиға у өзи иштирак қилған икән. Униң баян қилишичә, даириләр бултур йил бешида өй-имарәтләрдики диний түси қоюқ болған барлиқ шәкил вә нәқишләрни йоқитиветиш һәққидә уқтуруш чүшүргән. Бу уқтуруш 2-3 ай ичидә омумйүзлүк иҗра қилинип болған.
Һөрмәтлик радио аңлиғучилар, 2016‏-йилниң оттура вә ахирлири «мәсчитләрни сағламлаштуруш» нами астида хотән вә қәшқәрләрдә аз дегәндә 5 миңдин артуқ мәсчитниң чеқиветилгәнлики ашкариланған. 2018‏-Йилиға кәлгәндә шу аман қалған чәклик сандики мәсчитләрниң мунарлири чеқиветилгән. Бәзи вәзийәттин хәвәрдар кишиләр уйғур районда мәсчит мунарлирини өрүш яки кесиветиш ишиниң әмәлийәттә бирқанчә йил аввал оттуриға чиққанлиқини, әмма һазирқидәк омумлашмиғанлиқини илгири сүрмәктә.

Пикирләр (0)
Share
Толуқ бәт