Shinjang uniwérsitétida dersxanidin tutup kétilgen mehmut memtiminning 13 yilliq késilgenliki delillendi

Yéqinda “Shahit biz” torida shinjang uniwérsitétining oqughuchisi mehmut memtiminning qaghiliqtin kelgen ikki saqchi teripidin dersxanidin tutup kétilgenliki xewer qilin'ghanidi. Muxbirimizning bu heqte shinjang uniwérsitétigha qarita élip barghan téléfon ziyaretliri dawamida, mehmut memtiminning 2017-yili tutqun qilin'ghandin kéyin 13 yilliq késiwétilgenliki delillendi.

Musteqil tetqiqatchi gén bonin ependining feysbok hésabida xewer qilinishiche, shinjang uniwérsitéti uchur-téxnika institutining oqughuchisi mehmut memtimin, 1500 kilométir yiraqliqtiki yurti qaghiliqtin kelgen ikki saqchi teripidin dersxanidin tutup kétilgen. Gén bonin ependining aldinqi yili ashkarilan'ghan ürümchi saqchi arxipliridiki uchurlargha asasen bayan qilishiche, mezkur weqe 2017 ‏-yili 7 ‏-dékabir küni chüsh sa'et 12 mezgilide yüz bergen.

Biz bu heqte uchur élish üchün, shinjang uniwérsitétining alaqidar bölüm we organlirigha téléfon qilduq. Téléfonimizni qobul qilghan uchur téxnika instituti xadimi, mehmut memtimin mensup bolghan sinipning oqush püttürüp bolghanliqini eskertish bilen birlikte, bu heqte mektep partiye we memuriyet ishxanisidin melumat élishimizni tewsiye qildi.

shahit.biz

“Shahit biz” torida qeyt qilinishiche, mehmut memtimin, mezkur institutning kompyutér ilmi kespide oqughan bolup, u qol téléfonida intérnétta tamdin atlash détali w p n ni ishletkenliki üchün, gumanliq shexske aylan'ghan. Mehmut memtiminni dersxanidin tutup élip méngishqa shinjang uniwérsitéti saqchixanisining xadimliri maslashqan. Shinjang uniwérsitéti saqchixanisining ashkarilishiche, uchur téxnika instituti nöwette shinjang uniwérsitétidin yötkilip ketken bolghachqa, bu institutning jama'et xewpsizlik ishliri ghalibiyet saqchixanisigha ötküzüwétilgen.

Ghalibiyet saqchixanisi xadimi, mehmut memtiminni dersxanidin élip chiqip ketken saqchilargha shinjang uniwérsitétining abduweli isimlik bir saqchi xadimi hemkarlashqanliqini ashkarilidi. Mezkur xadim, mehmut memtiminning 2017-yili tutulghanliqini delillesh bilen birlikte, uning 13 yilliq késiwétilgenlikini ashkarilidi.

Déyilishiche, mehmut memtimin “Qanunsiz uchurlar” ni körgenliki üchün dölet bixeterlikige tehdit yetküzüsh bilen eyiblen'gen we nöwette tumshuq türmiside jaza mudditini ötimektiken.