Нур ширкитиниң хоҗайини нурмәмәт абдулла: «истиқбаллиқ карханичидин лаяқәтлик панаһланғучиға айландим»

Мухбиримиз шөһрәт һошур
2019-05-09
Елхәт
Пикир
Share
Принт
Нур ширкитиниң хоҗайини нурмәмәт абдулла әпәндим.
Нур ширкитиниң хоҗайини нурмәмәт абдулла әпәндим.
Photo: RFA

2006 ‏-Йили йүннән милләтләр университетиниң ташқи сода кәспини пүттүргән вә қисқа вақит ичидә иқтисадий җәһәттин қәд көтүргән нурмәмәт абдулла 2009‏-йилидики «үрүмчи томуз вәқәси» дин кейин нопус сетивелиш арқилиқ бир мәһәл «гуаңдоңлуқ» болувелишқа мәҗбур болған. Бу салаһийәтму униң уйғур кимликини йошуруп қалалмиғачқа у 2014‏-йили аилиси билән истанбулға көчүшкә вә шенҗендики «нур ташқи сода ширкити» ни чәтәлдә туруп маңдурушқа мәҗбур болған. 2016‏-Йилниң ахириға кәлгәндә униң 3 хитай банкисидики икки милйон йүәндин артуқ пули тоңлитиветилгән. Нәтиҗидә 2018‏-йилниң ахириға кәлгәндә у истанбулдин явропаға көчүп, ронақ тепиватқан бир карханичидин сиясий панаһланғучиға айланған.

Нурмәмәт абдулла йүннән милләтләр университетиниң ташқи сода кәспини пүттүргәндин кейин җеҗяңниң йиву шәһиридә бир мисирлиқниң ташқи сода ширкитидә ишлигән. У бу ширкәттә қисқа бир мәзгил тәҗрибә топлиғандин кейин, «ислаһ електр сайманлири ширкити» ни қурған вә ташқи сода билән шуғулланған. Ширкәт қурған дәсләпки йилдила бир милйон йүәндин артуқ пул тапқан нурмәмәт абдулла содидики билими, тәҗрибиси вә талантини өз ана туприқида җари қилдуруш үчүн 2009‏-йили үрүмчигә йөткәлгән. У «5 ‏-июл вәқәси» дин кейин тутқун қилинип бир йилчә қамалған вә «сиясий тәрбийә» дин өткән. Қамақтин чиққандин кейинки дишварчилиқ уни содида дәсләптә йол тапқан йиву шәһиригә қайтишқа мәҗбурлиған. Уйғурларға йивудиму арамчилиқ болмиғандин кейин у шенҗиндин нопус сетивелип, бир мәһәл «гуаңдоңлуқ» болувалған вә «нур ташқи сода ширкити» ни қурған. Кейинки йилларда уйғурларниң хитай өлкилиридә мәйли тиҗарәт яки башқа сәвәбләр билән туруши омумйүзлүк қийинлашқандин кейин у гуаңдоңдиму пут тирәп турушқа амалсиз қалған. Нәтиҗидә йилиға чәтәлгә 40-50 контейнер мал чиқириватқан вә һира намидики бир ресторанни шериклишип ечиватқан нурмәмәт абдулла 2014‏-йили аилиси билән түркийәгә көчүп кәлгән. У истанбулда өй-мүлүк содиси қилғандин башқа йәнә шенҗин вә хоңкоңдики ширкитиниң содисини давамлаштурған. 2016‏-Йилиға кәлгәндә униң 3 хитай банкисидики 2 милйон йүәндин артуқ пули тоңлитилған. Мал-мүлүктин айрилған нурмәмәт абдулла 2018‏-йили явропаға көчүп берип сиясий панаһланғучиға айланған.

Мәлум болушичә, хитай даирилириниң нурмәмәт абдуллаға қарита зиян зәхмити мал-дуня биләнла чәкләнмигән. Униң бир акиси лагерда җан үзгән, қалған қериндашлири аилиси бойичә лагерға соланған. Униң бу һәқтики баянлирини кейинки программимиздин аңлайсиләр.

Пикирләр (0)
Share
Толуқ бәт