ئىران ھۆكۈمىتى ئىسرائىلىيىنى خەلقئارا قانۇنلارغا خىلاپلىق قىلىش بىلەن ئەيىبلىدى

ئۆتكەن جۈمە كۈنى ئىسرائىلىيىنىڭ قاتناش - ترانسپورت مىنىستىرى شائۇل موفاز، ئەگەر ئىران يادرو قوراللىرىنى تەرەققى قىلدۇرۇشنى توختاتمىسا، ئىسرائىلىيىنىڭ ئىرانغا ئۆز ئالدىغا ھۇجۇم قوزغىشىدىن ساقلانغىلى بولمايدىغانلىقىنى بىلدۈردى.
مۇخبىرىمىز جۈمە خەۋىرى
2008-06-09
Share

 ئىسرائىلىيىنىڭ قاتناش - ترانسپورت مىنىستىرىنىڭ بۇ كۆز قاراشلىرى جىددىي ئىنكاسلارنى قوزغىغان بولسىمۇ، ئەمما ئىسرائىلىيە ھۆكۈمەت دائىرىلىرى مەزكۇر ئىسرائىلىيە ئەمەلدارىنىڭ بۇ خىل مەيدانىنىڭ دۆلەت سىياسىتىنى ئەكس ئەتتۈرەلمەيدىغانلىقىنى جاكارلىغان.

ئىسرائىلىيىگە جايلاشقان "يەھۇدى خەۋەرلەر تورى" بېتىدە خەۋەر قىلىشىچە، ئىسرائىلىيىنىڭ مۇئاۋىن دۆلەت مۇداپىئە مىنىستىرى ماتان ۋىلنائى بىر ئاقىل سىياسىيوننىڭ ئىسرائىلىيىنىڭ ئىستراتېگىيىلىك سىياسىتى ھەققىدىكى پىكىرلەردە سۈكۈتتە تۇرۇشى ۋە بىخەتەرلىك مەسىلىسىدىكى ئىشلارنى بۇ ئىشقا بىۋاستە ئالاقىدار ئورۇنلارغا قويۇۋېتىشى كېرەكلىكىنى بىلدۈرگەن.

موفازنىڭ باياناتچىسى تايال سومەچمۇ يۇقىرىقى پىكىرلەرنىڭ پەقەت موفازنىڭ شەخسى كۆز قارىشى ئىكەنلىكىنى بىلدۈرگەن بولسىمۇ، ئەمما مەزكۇر ئەمەلدارنىڭ ئىران ھەققىدە ئېيتقان بايانلىرىغا قارىتا ئىران ھۆكۈمىتى جىددىي ئىنكاس قايتۇرغان بولۇپ، ئىران ھۆكۈمىتى ئىسرائىلىيىنى خەلقئارا قانۇنلارغا خىلاپلىق قىلىش بىلەن ئەيىبلىگەن ھەمدە بىرلەشكەن دۆلەتلەر تەشكىلاتى بىخەتەرلىك كېڭىشىدىن بۇ ئىشقا دەرھال ھەرىكەت قوللىنىشنى تەلەپ قىلغان.

ئىسرائىلىيە ئەمەلدارى شائۇل موفازنىڭ يۇقىرىدا ئېيتقانلىرى خەلقئارا ئاتوم ئېنېرگىيە ئورگىنىنىڭ باشلىقى موھامەد ئەل بارادېئىنىڭ ئەيىبلىشىگە ئۇچرىغان بولۇپ، ئۇ ھازىر ئىران يادرو مەسىلىسىدە مۇھىم ئۆزگىرىش ياساش ئالدىدا تۇرغانلىقىنى ھەمدە ئۆز ئالدىغا ھەربىي ھەرىكەت قوللىنىشنىڭ خەلقئارالىق كېلىشىملەرگە خىلاپ ئىكەنلىكىنى بىلدۈرگەن.
پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت