Қарамайдики лагердин қоюп берилгән полат ибраһимниң 10 күндин кейин җан үзгәнлики илгири сүрүлмәктә

Ихтиярий мухбиримиз арслан
2020-01-20
Елхәт
Пикир
Share
Принт
Һазир истанбулда яшаватқан мунәввәр ханим лагерға соланған аилә әзалири вә қериндашлири.
Һазир истанбулда яшаватқан мунәввәр ханим лагерға соланған аилә әзалири вә қериндашлири.
RFA/Arslan

Һазир истанбулда яшаватқан мунәввәр ханим йолдиши полат ибраһимниң қарамайдики лагердин дохтурханиға елип чиқилип 20 күн давалитилғанлиқи, ахирида өйигә қоюп берилип, 10 күндин кейин туюқсиз өлүп кәткәнликини билдүрди.

Мунәввәр ханим йәнә аилисидин 3 иниси вә 2 сиңлисини өз ичигә алған бирмунчә туғқанлириниң лагерға қамалғанлиқини ашкарилиди.

Әсли қарамай шәһиридин болған мунәввәр аблимит ханим аилисидикиләрниң һәммисиниң ишчи-хизмәтчи икәнликини, дадиси аблимит һаҗим билән аниси айимниса ханимниң илгири һәҗ пәрзни ада қилғанлиқини, уларниң күндә бәш вақ намаз оқуғандин башқа һечқандақ гунаһи йоқлуқини, бирақ хитай даирилириниң уларниң аилиси «диний аилә» дәп анисидин башқа пүткүл аилә әзалирини тутуп кәткәнликини билдүрди.

Мунәввәр ханимниң бир қиз, бир оғул икки пәрзәнти болуп, у пәрзәнтлирини түркийәдә оқутуш үчүн 2015-йили 7-айниң 11-күни истанбулға келип орунлашқан икән. Мунәввәр ханим балилирини истанбулда мәктәпкә орунлаштуруп қоюп икки айдин кейин қарамайға қайтип кәткән. У қарамайға қайтип барғандин кейин сақчилар тәрипидин бир қанчә қетим сораққа тартилған. Вәзийәттә өзгириш болуп, һөкүмәт уйғурларниң паспортлирини йиғивелишқа башлиғанда мунәввәр ханим 2016-йили 2-айниң 19-күни түркийәгә қайта келивалған.

Мунәввәр ханим истанбулға кәлгәндин кейин униң йолдиши полат ибраһим қарамайда хитай сақчилири тәрипидин тутуп кетилгән. Униң йолдиши лагердики қийин-қистақ түпәйли йүрәк кесили қозғилип, дохтурханиға елип чиқилған вә бир мәзгил давалитилғандин кейин өйигә қоюп берилгән. Һалбуки, өйигә қайтип чиқип 10 күн болғанда, йәни 2017-йили 3-айниң 3-күни туюқсиз җан үзгән.

Мунәввәр ханим йолдишиниң өлүм хәвирини инисиниң шу күни йоллиған авазлиқ учурдин хәвәр тапқанлиқини, кейин истанбулға кәлгән йеқин тонушлиридин бу әһвалларни сорап билгәнликини вә мийитини ююватқанда тартилған рәсимләрни көргәнликини баян қилди. Мунәввәр ханим йәнә һаят қалған башқа уруқ-туғқанлиридин һечқандақ учур алалмиғанлиқидин қаттиқ әндишидә икәнликини билдүрди.

Мунәввәр ханим сиңлиси сәнәвәр аблимитниң қарамай телевизийә истансисида ишләйдиғанлиқини, бирақ һазир йиғивелиш лагериға қамалғанлиқини билдүрди. Униңдин башқа йәнә иниси әнвәр аблимитқа 8 йиллиқ қамақ җазаси берилип түрмигә қамалғанлиқини, йәнә бир иниси аблаҗан аблимитниң лагерда икки пути мейип болуп маңалмас болуп қалғандин кейин өйигә қоюп берилгәнликини ашкара қилди. У йәнә бир иниси мухбил аблимит вә йолдиши полат ибраһимниң ачиси рәйһан ибраһим қатарлиқ аилә җәмәтиниң тутулуп кетилгәнликини, һазир уларниң ақивитиниң қандақ болғанлиқини билмәйдиғанлиқини илгири сүрди.

Мунәввәр аблимит ханим өзиниң икки балисини түркийәгә елип келип мәктәптә оқутуштин башқа һечқандақ гунаһи йоқлуқини, хитайниң сияситигә қарши һечқандақ бир паалийәткә қатнашмиғанлиқини, шундақ болсиму пүтүн аилисидин ака-инилири, ача-сиңиллириниң тутуп кетилгәнликини, уларниң тутулуп кетишигә өзиниң чәтәлгә чиққанлиқи сәвәб болди дәп қарайдиғанлиқини тәкитлиди.

Мунәввәр аблимит ханим ахирида дуня җамаитигә хитаб қилип, бирләшкән дөләтләр тәшкилати вә америка қатарлиқ пүткүл демократик дөләтләр һәмдә хәлқаралиқ тәшкилатларниң уйғурларға игә чиқишини тәләп қилидиғанлиқини билдүрди.

Пикирләр (0)
Share
Толуқ бәт