Da'iriler 5 - iyul weqesining 3 yilliqi harpisida ürümchide jiddiy tedbir élishqa bashlidi

Dunya Uyghur qurultiyi bayanatchisi dilshat rishitning bildürüshiche, Uyghur aptonom rayon da'iriliri 5 - iyul mezgilide jiddiy tedbir élishni tekitlep, Uyghurlargha qarita basturushni kücheytiwatqan mezgilde, ötken hepte ürümchide Uyghur yashliri bilen saqchilar ottursida toqunush yüz bérip, bir neper saqchi yarilinip, ikki neper Uyghur yash tutqun qilin'ghan.

Muxbirimiz méhriban
2012.06.26

Bayanatchi dilshat rishit bu weqe heqqide radi'omizgha bergen bayanatida, “Da'irilerning sherqiy türkistanda élip bériwatqan yuqiri bésimliq basturush siyasiti rayondiki Uyghurlarning naraziliqini qozghighanliqi üchün bundaq weqening yüz bergen” likini tekitlidi.

Xitay xewerliridin melum bolushiche, xitayning Uyghur aptonom rayonigha belgilen'gen partkom sékritari jang chünshen 18 - iyun küni muqimliqqa kapaletlik qilish yighini échip, “5 - Iyul weqesining 3 yilliq harpisi hem 18 - qurultay échilishning aldida, sezgürlükni ashurup, jem'iyet muqimliqigha kapaletlik qilish, intérnét kontrolluqini kücheytip, uchur toplashni kücheytish, köchme nopuslarni bashqurushni kücheytip, chet'eldin kelgen muhajirlargha qaritilghan tekshürüshni kücheytish” ni telep qilghan.

Da'iriler yene, tuyuqsiz yüz bérish éhtimali bolghan weqelerning aldini élish üchün, Uyghurlarning bir yerge toplinishining aldini élishta jiddiy tedbir qollan'ghan. Melum bolushiche, bir aydin buyan ürümchide dawamlishiwatqan memliketlik b derijilikler potpol musabiqiside, nechche onminglighan Uyghur putpol heweskarining meydan'gha toplinishi da'irilerni ensiretken. Bu heqtiki uchurlardin melum bolushiche, da'iriler tuyuqsiz uqturush qilip, ötken jüme 22 - iyun ürümchide ötküzülgen musabiqe waqtini esli belgilen'gen waqittin2 sa'et ilgiri sürgen. Shundaqla bundin kéyinki musabiqilerning ürümchide emes, shixenzide ötküzülidighanliqini uqturghan.

Köp körülgen xewerler

RFA