Дилбәр тохти йәкән наһийилик сақчи идариси үстидин әркин асия радиосиға шикайәт хети язди

Биз түнүгүн йәни 2009 - йили 5 - айниң 20 - күни уйғур елиниң йәкән наһийисидин дилбәр тохтиниң йәкән наһийилик сақчи идариси үстидин, әркин асия радио истансисиниң уйғур бөлүмигә йоллиған шикайәт хетини тапшурувалдуқ.
Мухбиримиз миһрибан
2009.05.21
Share on WhatsApp
Share on WhatsApp

Дилбәр тохти өз шикайәтнамисидә, ери мәмәт турсун ташниң 2006 - йили 1 - айниң 24 - күни йәкән наһийилик сақчи идарисиниң гүлбағ йезилиқ сақчиханисиниң сақчи хадими абдукерим қатарлиқлар тәрипидин тутуп кетилип, вен җиңшян исимлик сақчи хадими тәрипидин қаттиқ қийнақ арқилиқ сорақ қилинған, сақчиларниң күшкүртүши билән йәнә бир камердики қасим, турсун қатарлиқлар тәрипидинму урулған нәтиҗидә 11 күндин кейин йәни 2006 - йили 2 - айниң 6 - күни, сақчиханиниң тутуп туруш орнида, һечқандақ қолға елиш буйруқи болмиған, техи җинайити бекитилмигән, җаза һөкүм қилинмиған әһвал астида өлүп кәткән" ликини баян қилған.
 
Йәкән наһийилик тәптиш идариси қанун дохтури әһәт әхмәтниң тәкшүрүшичә асасән, мәмәт турсун ташниң һәқиқәтән қаттиқ қийнақ вә таяқ зәрбисидин өлгәнликини бекиткән.

Әмма, йәкән наһийилик тәптиш идариси бу дело үстидин 2006 - йили чиқарған 1 - номурлуқ һөкуүмнамисидә,сақчихана башлиқи шу тоңренни вәзиписидин қалдуруш биләнла чәкләнгән, мәмәт турсун ташниң өлүмигә сәвәп болған сақчи хадимлири қануни җавабкарлиққа тартилмиған.

Дилбәр тохтиниң көп қетим әрз қилиши билән, 2009 - йили, даириләр мәмәт турсунниң анисиға 50 миң йүән хәлқ пули, аяли дилбәр тохти вә оғлиға 60 миң йүән төләм пули беришни һөкүм қилған.

Дилбәр тохти бу һөкүмгә қайил болмиған һәм төләм пули елишниму рәт қилған. У қәшқәр юқири дәриҗилик орунларға әрз қилиш үчүн барғинида, йәкән наһийилик сақчи идариси сақчиларни әвәтип дилбәр тохтини тутуп әкилип, йәкән наһийилик сақчиханиға 10 күн солап қойған.

Дилбәр тохтиниң дадиси тохти һошур қизи дилбәр тохтини давалитиш үчүн үрүмчигә бармақчи болғинида дадиси тохти һошурниму 15 күн солап қойған, таки дилбәр тохтиниң аниси амангул қурбан 60 миң йүән төләм пулини елишқа рази болғинидин кейинла, йәкән наһийилик сақчи идариси дилбәр тохти вә униң аилисиниң юқири дәриҗилик органларға әрз қилмаслиқ шәрти билән дилбәр тохти вә дадиси тохти һошурни тутуп туруш орнидин қоюп бәргән.
 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.