Франсийә пәләстинниң б д т да “назарәтчи дөләт” болуш илтимасини қоллайдиғанлиқини билдүрди

Пәләстин һөкүмити өткән йили б д т ға сунған рәсмий әзалиқ илтимаси б д т бихәтәрлик кеңиши тәрипидин рәт қилинғандин кейин, б д т гә әза болмиған назарәтчи дөләт болушқа илтимас сунған иди.
Мухбиримиз шөһрәт һошур
2012.11.27

Пәләстин б д т да бу хил салаһийәткә еришсә, б д т ичидики көплигән тәшкилатлар билән мунасивәт қилалайдиған, болупму, хәлқара сот мәһкимисигә биваситә әрз суналайдиған болғачқа, бу илтимасқиму исраилийә қарши туруп кәлгән. Бүгүн франсийә ташқи ишлар министири бу һәқтә пикир баян қилип, франсийиниң келәр һәптә б д т омуми йиғинида авазға селинидиған пәләстинниң мәзкур тәлипигә қоллап аваз беридиғанлиқини билдүргән.

Франсийә ташқи ишлар министири франсийиниң бу мәйданиға изаһат берип, франсийиниң бурундинла пәләстинниң б д т ға әзалиқ илтимасини қоллап кәлгәнликини, шуңа принсипал мәйданини көрситиш үчүн, пәләстинниң әза болмиған назарәтчи дөләтлик салаһийәт тәлипиниму қоллайдиғанлиқини билдүргән.

Б б с ниң бүгүнки бу һәқтики хәвиридә баян қилинишичә, франсийә пәләстинниң б д т ға сунған илтимасини қоллиған тунҗи чоң явропа дөлити һесаблиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.