12 Yashliq Uyghur ösmürning öltürülüshige naraziliq bildürüp washin'gtondiki xitay elchixanisi aldida namayish ötküzüldi

Amérika Uyghur jem'iyiti teripidin uyushturulghan mezkur namayish, korla saqchi da'irilirining 20‏-may mirzat amanulla shahyari isimlik 12 yashliq bir ösmür balini mexpiy qur'an kursigha qatnashqanliq sewebidin tutup kétip, etisi a'ilisige jesitini tapshurup bergenlikige naraziliq bildürüsh yüzisidin élip bérilghan.

Mirzat amanullaning mekkide turushluq dadisining ashkarilishiche, mirzatning beden, boyun we bash qismida éghir tayaq izi bolsimu, biraq korla saqchi da'iriliri uning anisini chaqirip, mirzatning tamgha üsüp ölüwalghanliqi we jesetni héchqandaq dawrang salmay derhal depine qiliwétishni telep qilghan.

Bu weqe axbarat wasitiliride ashkarilan'ghandin kéyin, chet'eldiki Uyghur muhajirliri arisida küchlük inkas qozghighan idi. Bu weqening yene, memliket ichi we sirtida “5-Iyul weqesi” din buyan iz déreksiz yoqap ketken Uyghurlarning iz dérikini qilish chaqiriqi küchiyiwatqan mezgilde yüz bérishi, ilgirilep naraziliq qozghighan.

Jüme künki namayish amérikining sherqiy qirghiqi waqti bilen chüshtin kéyin ötküzülgen. Bu jeryanda namayishchi amma xitayning Uyghurlargha qaratqan siyasitini tenqid qilidighan her xil sho'arlarni towlap, Uyghurlarning kishilik hoquqigha hörmet qilishni telep qilghan.