Палав президенти палавдики уйғурларниң австиралийигә орунлишиш тәлипини қоллайдиғанлиқини билдүрди

Бирләшмә агентлиқиниң хәвәр қилишичә, палав президенти җонсон тробиоң, пәйшәнбә күни австралийигә қилидиған зиярити җәрянида, бултур 11 - айда палавға орунлаштурулған 6 нәпәр уйғурниң, нөвәттә палавға әң йеқин дөләт болған австралийигә орунлишиш тәлипини австралийә даирилиригә йәткүзидиғанлиқини һәм бу уйғурларниң австиралийигә орунлишиш тәлипини қоллайдиғанлиқини билдүргән.
Мухбиримиз миһрибан
2010.07.22

Гуәнтанамода тутуп турулуватқан уйғурларниң 6 нәпири өткән йили 11 - айда тинч окяндики палав дөлитиниң мәркизи шәһири корорға орунлаштурулған иди. Әйни чағда палав президенти җонсон торибиоң айродромға өзи чиқип, 6 уйғурни күтүвалған вә бу уйғурлар шәһәр мәркизидики чоң бир өйгә орунлаштурулған иди.

Әмма, палав дөлити тинч окяндики кичик арал дөлити болуп, нопуси аран 20 миң әтрапида болғини үчүн, бу уйғурларға палавға мәңгүлүк йәрлишиш пурсити йоқ икән. Шуңа бу уйғурлар бу бир нәччә айдин буян үзлүксиз һалда, өзлири үчүн мәңгүлүк олтурақлишиш имканийити беридиған һәм уйғур җамаити нисбәтән көп болған бирәр дөләткә йөткилишни тәләп қилип келиватқан болуп, уларниң арисидики әдһәм мәмәт исимлик бирәйлән, йеқинда австралийә пуқралиқиға өткән бир уйғур аял билән никаһланған икән. Һазир австралийә палавдики уйғурлар үчүн әң мувапиқ җай дәп қариливатқан болуп, палав президенти җонсон тробиоңму бу уйғурлар австиралийигә орунлашса улар үчүн һәр җәһәттин қулайлиқ болидиғанлиқини билдүргән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.