Чәтәллик дипломатлар үрүмчи зияритидә зораванлиқниң мәсилә һәл қилалмайдиғанлиқини билдүрди

Дипломатлар зиярәт өмикиниң башлиқи ғәрби африқидики того җумһурийитиниң баш әлчиси Nolama Ta Ama түнүгүн зиярәт давамида сөз қилип, зораванлиқниң дуняда һечқандақ бир мәсилини һәл қилалмайдиғанлиқини тәкитлигән.

Нөвәттә хитай һөкүмити 5 ‏ - июлда намайишчиларниң зораванлиқ қилғанлиқини илгири сүрсә, муһаҗирәттики уйғур тәшкилатлири хитай қораллиқ қисимлириниң зораванлиқ қилғанлиқини баян қилмақта. Баш әлчи ноломаниң бу йәрдә зораван тәрәп сүпитидә қайси тәрәпни көздә тутқанлиқи мәлум әмәс. Әмма хәлқара җамаәт хитай һөкүмитиниң һәр қандақ шәкилдики өктичи һәрикәтни зорлуқ вастилири билән бастуруватқанлиқини йиллардин бери әйибләп кәлмәктә.

Зиярәт давамида, уйғур райониниң рәиси нур бәкри сөз қилип, 5 ‏ - июл вәқәсини аз сандики бир очум кишиләрниң пәйда қилғанлиқини, уларниң уйғур миллитигә вәкиллик қилалмайдиғанлиқини билдүргән. У сөзидә йәнә, 5 ‏ - июлға диний саһәдин бирму кишиниң қетилмиғанлиқини әскәрткән.

Өмәк башлиқи намола сөзидә, өзлириниң хитайниң дөләт пүтүнлүкини қоллайдиғанлиқини билдүрүш билән биллә, вәқә һәққидә һәқиқий мәлуматқа еришишни халайдиғанлиқини билдүргән. Бу сөз вәкилләр өмикиниң бүгүнгә қәдәр хитай сунған мәлуматқа гуман билән қарап кәлгәнликини көрсәтмәктә.