Хитай муавин дөләт рәиси ши җинпиң үрүмчидә йиғин ечип, ваң лечуәнни вәзиписидин қалдурғанлиқини җакарлиди

Хитай компартийиси мәркизий комитети сиясий бюроси шинҗаң мәсилиси бойичә йиғин чақирип, райондики мәсилиләрни музакирә қилиш билән бир вақитта йәнә уйғур аптоном райони коммунистик партийә комитетиниң секретари ваң лечуәнни вәзиписидин қалдуруп, уни мәркизий сиясий - қанун комитетиниң муавин секритарлиқиға йөткәш, униң орниға хунән өлкилик партийә комитетиниң секретари җаң чүншәнни қоюшни қарар қилғандин кейин, мәркизий комитети сиясий бюросиниң даимий һәйәт әзаси, муавин дөләт рәиси ши җинпиң, мәркизий комитет тәшкилат бөлүм башлиқи ли юәнтав қатарлиқлар үрүмчигә келип, бу һәқтә мәхсус йиғин чақирип, орунлаштуруш елип барған.
Мухбиримиз үмүдвар
2010.04.25

Шинхуа ахбарат агентлиқиниң хәвәр қилишичә, 24 - чесла чүштин кейин ечилған уйғур аптоном районлуқ рәһбири кадирлар йиғинида ши җинпиң сөз қилған һәмдә мәркизий комитет тәшкилат бөлүм башлиқи ли юәнқав мәркәзниң ваң лечуәнни уйғур елидики хизмитидин қалдуруш қарарини елан қилған.

Хәвәрдә көрситилишичә, хитай муавин дөләт рәиси ши җинпиң йиғинда қилған сөзидә мәркәзниң ваң лечуәнни орнидин қалдуруш қарари һәққидә изаһат берип, "мәркәз шинҗаңниң рәһбәрлик гурупписи қурулушиға алаһидә әһмийәт бериду, бу қетим аптоном райониниң асасий рәһбәрлик гурупписини тәңшәш мәркәзниң пүтүн мәмликәт хизмитиниң чоң вәзийитидин чиқиш қилип, шинҗаң рәһбәрлик гурупписи қурулушиниң әмәлийити, хизмәт еһтияҗиға асасән пухта тәтқиқ қилиш арқилиқ чиқарған қарар" дәп көрсәткән. У, йәнә "йолдаш ваң лечуән сиясий җәһәттин қәтий, партийигә садиқ болуп, шинҗаңниң тәрәққияти вә муқимлиқиға муһим төһпә қошти" дәп ваң лечуәнгә баһа бәргән.

Ши җинпиң йәнә ваң лечуәнниң орниға тәйинләнгән җаң чуншәнни тонуштуруп, "мәркизий комитетниң уни уйғур аптоном райони партийә комитетиниң секритарлиқиға лайиқ дәп қариғанлиқи"ни әскәрткән.

Бу йиғинда йәнә җаң чүншәнму сөз қилған. Мәркәзниң ваң лечуәнниң уйғур елидики 16 йиллиқ һөкүмранлиқ хизмитидин қалдуруш йиғиниға ваң лечуән өзи риясәтчилик қилған болуп, у йиғинда қилған сөзидә, "шинҗаң һәр милләт хәлқ аммисиниң ишәнчиси, көңүл бөлүши вә қоллишиға рәһмәт ейтимән" дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.