Хитай вәкилләр өмики тибәт байриқи түпәйли чехийә парламентини тәрк әтти

Чехийәдә зиярәттики хитай хәлқ қурултийи миллий ишлар комитетиниң вәкилләр өмики пәйшәнбә күни чехийә парламентидики йешиллар партийиси парламент әзалириниң тибәт байриқини чиқарғанлиқи түпәйли чех парламент залини тәрк әткән.
Мухбиримиз әркин
2008.09.26

Чехийә мәтбуатлириниң хәвәр қилишичә, хитай хәлқ қурултийи миллий ишлар комитетиниң вәкилләр өмики прагаға келип, чехийә парламенти төвән палатаси әрз ‏ - шикайәт комитетиниң әзалири билән сөһбәт өткүзмәкчи иди.

Чехийә йешиллар партийисиниң парламент әзаси катирена җәкс йешиллар партийиси парламент әзалириниң һәрикитини ақлап, " биз хитай вәкиллири билән өткүзүлидиған сөһбәттә өзимизниң кишилик һоқуқ вә тибәт мәсилисидики туйғунлиқимизни ипадилидуқ " дәп тәкитлигән.

Чехийә сабиқ совет иттипақи орбитисидики шәрқий явропа әллири ичидә хитайниң кишилик һоқуқ вәзийити вә тибәт мәсилисигә алаһидә көңүл бөлидиған дөләтләрниң биридур.

2007 ‏ - Йили 6 ‏ - айда дуня уйғур қурултийи рәиси рабийә қадирниң буш билән елип барған учришиши чехийә пайтәхти прагада елип берилған. Лекин йешиллар партийиси парламент әзалириниң һәрикити чех комунистик партийисиниң тәнқидигә учриған. Чехийә мәтбуатлири чех коммунистик партийә парламент әзаси павел ковачикниң йешиллар парламент әзалириниң һәрикитини " иғвагәрчилик вә балиларчә һәрикәт " дәп тәнқид қилғанлиқини билдүргән.

Бу йил 8 ‏ - айда бейҗиң олимпик йиғини башлинишидин бурун чехийә баш министири мирек тополанек олимпик йиғиниға қатнишидиғанлиқи, лекин ечилиш мурасимиға иштирак қилмайдиғанлиқини җакарлиғанда мәйдисигә тибәт изники тақивалған иди. Бу хитай даирилирини наһайити биарам қилған.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.