“Sherqiy türkistan yashlar merkizi” tuyuq yoldiki Uyghur yashlirigha ümid ata qilmaqta
2023.07.25

Istanbulning sefaköy rayonida Uyghur yash abdusemi xoten bashchiliqida qurulghan “Sherqiy türkistan yashlar merkizi” (salametlikini eslige keltürüsh merkizi) istanbulda tuyuq yolgha kirip qalghan Uyghur yashlirining özgirishige hemde salametlikining eslige kélip we yéngidin bir hayat qurushigha yardem qilip, ularning ümidi bolmaqta.
“Sherqiy türkistan yashlar merkizi” 2021-yildin buyan buyan istanbulda zeherlik chékimlikke xumar bolup qalghan, mejburiy halda kochilarda oghriliqqa yaki tilemchilikke sélin'ghan bir qisim Uyghur yash-ösmürlirige quchaq échip, ularni turalghu bilen teminligen, shundaqla yüzligen Uyghur yashlirining özgirishige hemde salametlikining eslige kélishige yardem qilghan. Buning bilen türkiyediki tuyuq yolgha kirip qalghan yüzligen Uyghur yashlirigha ümid, jasaret we yéngidin hayat qurush pursiti ata qilghan.
Biz bu munasiwet bilen mezkur merkezning mes'uli abdusemi xoten we bu merkezde dawalinip saqayghan, shundaqla mu'eyyen kesip öginip, özining kélechikini qayta yaritishqa bel baghlighan Uyghur yashliri bilen söhbetleshtuq.
Radiyomizning ziyaritini qobul qilghan abdusemi xoten sözide, turmush qiyinchiliqi, yalghuzluq we bashqa sewebler tüpeyli tuyuq yolgha kirip qélip, zeherlik chékimlik, oghriliq, tilemchilik patqiqigha kirip qalghan Uyghur yashlirigha yardem qilish meqsitide istanbulning sefaköy rayonida “Sherqiy türkistan yashlar merkizi” ni qurghanliqi, shuningdek bu jeryanda zeherlik chékimlikke xumar bolup qalghan yashlarning salametlikini eslige keltürüshige qandaq yardemlerde bolghanliqi heqqide melumat berdi.
Bu merkezde dawalinip saqiyip chiqqan Uyghur yashliridin biri söhbitimiz jeryanida “Sherqiy türkistan yashlar merkizi” ge kirishtin burun hayatqa bolghan ümidining yoqalghanliqini, emma bu merkezge kirgendin kéyin özide hayatini yéngidin bashlash istiki oyghan'ghanliqini sözlep berdi.

Bu merkezde ikki yildin buyan turuwatqan yashlarning yene biri bu merkezde tuyuq yolgha kirip qalghan yashlarning ehwaligha qarita perqliq pirogramma we derslerning tesis qilinishini bekmu emeliy bolghan charilerdin, dep qaraydu.
Iqtisadtin qiynilip “Sherqi türkistan yashlar merkizi” de ikki yildin buyan turuwatqan bashqa bir yash bolsa bu merkezdiki türlük hüner-kesip, in'gliz tili öginish, tenterbiye, söhbet we dala seylisi qatarliq pa'aliyetlerning bu jaydiki yashlarning yéngidin hayatliq yoligha méngishida türtkilik rol oynighanliqini alahide tilgha aldi.
Axirida, abdusemi xoten Uyghur yashlirining özgirishige hemde salametlikining eslige kélip jem'iyetke yaramliq adem bolushigha özining pidakarliq qiliwatqanliqini, bu yashlarning bashqilargha yük bolup qalmay musteqil yashap, Uyghur millitige xizmet qilidighan kishilerdin bolup chiqishini ümid qilidighanliqini tekitlidi.