Шиветсийәдә җаза лагерлири тоғрилиқ «нәқ мәйдан гуваһлиқи йиғиш» паалийити өткүзүлди

Ихтиярий мухбиримиз әкрәм
2020-01-17
Share
Shiwetsiyede-Guwahliq-02.jpg Шиветсийәдә өткүзүлгән «нәқ мәйдан гуваһлиқи йиғиш» паалийитиниң уқтуруши.
RFA/Ekrem

Муһаҗирәттики уйғурлар 2017-йилидин етибарән иҗтимаий таратқуларда хитайниң уйғур диярида тәсис қилған җаза лагерлириға қамалған ата-ана, қәвми-қериндашлири вә дост-бурадәрлири тоғрилиқ гуваһлиқ бериш паалийитини башлиғандин кейин 2018-2019-йиллири бу паалийәт юқири долқун һасил қилған иди. 2020-Йилиниң муқәддимисидиму гуваһлиқ бериш һәрикәтлири кәң қанат йейишқа башлиди.

Җаза лагерлиридики тутқунларниң архипини турғузуш хизмити билән мәшғул болуп келиватқан мәркизи норвегийәниң осло шәһиридики «уйғур әдлийә архипи амбири» һазирға қәдәр 5 миңдин артуқ уйғурниң архипини хатириләп чиққан болуп, йеқиндин буян бу орган син көрүнүшлири арқилиқ гуваһлиқ бериш паалийитини йолға қоюп, топлиған гуваһлиқ көрүнүшлирини ингилизчә тилларға тәрҗимә қилип елан қилмақта иди. 

17-январ чүштин кейин шиветсийә уйғур маарип уюшмисиниң орунлаштуриши, «уйғур әдлийә архипи амбири» хадимлириниң иштиракида «нәқ мәйдан гуваһлиқи йиғиш» паалийити өткүзүлгән. Паалийәттин илгири җүмә намизида гуваһлиқ ишлири тоғрисида вәз ейтилған. Шиветсийәниң пайтәхти ситокһолим шәһиридики бир бөлүк уйғурлар бу паалийәткә актип қатнишип хитайниң җаза лагирлириға қамалған уруғ-туғқанлири тоғрилиқ гуваһлиқ бәргән. 

«Уйғур әдлийә архипи амбири» ниң мәсули, норвегийә уйғур комитетиниң рәиси бәхтияр өмәр әпәнди бу һәқтә тохталғанда бүгүнки бу «нәқ мәйдан гуваһлиқи йиғиш» паалийитиниң наһайити нәтиҗилик өткүзүлгәнликини илгири сүрди.

Икки күн давамлишидиған бу паалийәт һәққидә тохталған шиветсийәдики уйғур зиялийси ниҗат турғун әпәнди бу гуваһлиқларниң хитайниң сахта тәшвиқатлирини ағдуруп ташлашта зор рол ойнайдиғанлиқини тәкитлиди.

Шиветсийә уйғур маарип уюшмисиниң мәсуллиридин абдулла көкяр әпәндиму бу һәқтә пикир баян қилип, гуваһлиқ беришниң һәр түрлүк әһмийәтлирини тилға алди. У сөзидә гуваһлиқтин өзини қачурушниң диний, миллий вә инсаний нуқтидин хата болидиғанлиқини изаһлиди.

2019-Йили 12-айниң 9-күни уйғур аптонум районлуқ һөкүмәтниң рәиси шөһрәт закир «лагирдикиләрниң оқуш пүттүрүп өйлиригә қайтқан» лиқини тилға алған болсиму, буниң ялғанлиқини испатлаш йүзсидин һазирға қәдәр вәтәндики уруғ-туғқанлири билән алақә қилалмай келиватқан муһаҗирәттики көплигән уйғурлар гуваһлиқ бериш паалийәтлирини һелиһәм давамлаштурмақта. 

«Уйғур әдлийә архипи амбири» ниң мәсули бәхтияр өмәр әпәнди «нәқ мәйдан гуваһлиқи йиғиш» паалийитини алдимиздики күнләрдә йәнә уйғурлар топлишип олтурақлашқан башқа дөләтләрдиму қанат яйдуридиғанлиқини әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.