Gérmaniyede xitayning közitish apparatlirigha téxnikiliq yardemde bolghan Siemens shirkitige qarshi namayish ötküzüldi

Ixtiyariy muxbirimiz ekrem
2020-07-28
Share
Siemens-aldida-namayish.jpg Gérmaniyediki eng chong sana'et guruhi bolghan Siemens shirkitining myunxéndiki bash shtabi aldida ötküzülgen namayishtin körünüsh. 2020-Yili 27-iyul.
RFA/Ekrem

Gérmaniyediki eng chong sana'et guruhi bolghan Siemensning myunxéndiki bash shtabi aldida namayish ötküzüldi.

27-Iyul merkizi myunxén shehiride bolghan "Yawropa sherqiy türkistan birliki" bilen merkizi göttin'gén shehiridiki "Xeter astidiki xelqler teshkilati" ning birlikte uyushturushida gérmaniyediki eng chong sana'et guruhi bolghan Siemens shirkitining myunxéndiki bash shtabi aldida namayish ötküzüldi.

Bu qétimqi namayishni teshkilligüchilerning biri bolghan "Yawropa sherqiy türkistan birliki" ning re'isi esqerjan ependining bildürüshiche, Siemens sana'et goruhining xitay bilen bolghan tijariy hemkarliqi da'iriside "Xitay éléktron téxnologiyesi shirkiti" bilenmu alaqisi bolup, Siemens bu xitay shirkitining chiray tonush iqtidarigha ige bolghan közitish apparatlirini ishlepchiqirishigha téxnika jehettin yardemlishishni dawam qilip kelmekte iken. Halbuki, bu shirketning közitish apparatliri sherqiy türkistan xelqini nazaret qilish wezipisini öteydiken.

Namayishchilar kötürüwalghan ay-yultuzluq kök bayraq we lozunkidiki Siemens shirkitining bash diréktori joye kayserning chongaytilghan resimi astigha yézilghan "Sodida wijdan yoqmu, kayser ependi?" dégen ibariler kishilerning diqqitini tartqan. Gérmaniyediki chong téléwiziye qanili bolghan SDF, yeni "Jenubiy gérmaniye téléwiziyesi" qanili neq meydandin namayish xewirini tarqitip belgilik tesir peyda qilghan. Bu xewer 27-iyul téléwizorda tekrar-tekrar körsitildi.

SDF Qanili mezkur namayish toghrisida bergen xewiride "2 Milyondin artuq Uyghurlar xitayning qayta terbiyilesh merkizige qamilip turmaqta" dégen jümlini ishletti. Xewerde sim tosuqlar bilen oralghan jaza lagérlirining körünüshliri körsitilip, Uyghurlarning nöwette éghir derijide nopus qirghinchiliqi we medeniyet qirghinchiliqigha duch kéliwatqanliqi, Siemens ke oxshash chong shirketlerning Uyghurlar uchrawatqan kishilik hoquq depsendichiliklirini nezerge almaywatqanliqi, kishilik hoquq organlirining bésimliridin özini qachuruwatqanliqi yaki xitay shirketliri bilen bolghan tijariy alaqilarda kishilik hoquq depsendichilikige chétishliq ishlarni qilmighanliqini ilgiri sürüp kelgenliki tilgha élindi. Filimda yene közliri téngilghan, qolliri baghlan'ghan Uyghurlarning mejburi emgek üchün xitaygha yötkiliwatqan körünüshlirigimu orun bérildi.

Bu qétimqi namayishqa qatnashqan "Xeter astidiki xelqler teshkilati" bérlin ishxanisining mudiri xanno shidlér ependi bu heqte toxtalghanda "Awwal gérmaniye, andin pütün yawropa xitay bilen bolghan hemkarliqini qayta közdin köchürüshi kérek," dédi. U munularni tilgha aldi: "Gérmaniye bashta bolup pütkül yawropaning xitay bilen bolghan siyasiy we tijariy munasiwetlirini qaytidin közdin köchüridighan waqti keldi. Gérmaniye we yawropa ittipaqigha eza döletler xitay bilen soda hemkarliqlirida choqum kishilik hoquq depsendichilikliridin yiraq turushi, Uyghurlarni nezerdin saqit qilmasliqi lazim".

Bu qétimqi namayishqa ishtirak qilghan myunxén shehiridiki jama'et erbabliridin nur'ehmet qarim bu heqte toxtalghanda, bu namayishning etraptiki yerlik xelqning diqqitini tartipla qalmay, Siemens shirkitidiki xizmetchi xadimlarningmu küchlük diqqitini tartqanliqini eskertti.

Esqerjan ependining bildürüshiche, xitay bilen soda hemkarliqida boluwatqan gérmaniye shirketliri az emesken. U sözide, bundin kéyin bu shirketlerning xitay bilen bolghan hemkarliqigha qarshi pa'aliyetlerni rawajlandurush zörüriyiti barliqini tilgha aldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.