Bélgiye Uyghur jem'iyiti bashqurush hey'itini yéngidin saylap chiqti

Ixtiyariy muxbirimiz erkin tarim
2013.12.17

Yawropadiki sherqiy türkistan ammiwi teshkilatliri 14-15-dékabir künliri arqa-arqidin saylam ötküzüp, bashqurush hey'etlirini yéngidin saylap chiqti. Bu teshkilatlardin biri bélgiye Uyghur jem'iyitidur.

Bélgiyening paytexti biryussél shehiride ötküzülgen saylamgha bélgiyede yashawatqan 200 etrapida Uyghur qatnashqan bolup, abdulla ömerof ependi jem'iyetning re'islikige saylandi. Démokratiyelik usulda, dostluq ichide élip bérilghan bu saylamgha bélgiyede yashawatqan Uyghurlardin bashqa yene dunya Uyghur qurultiyi re'isi rabiye qadir xanim, dunya Uyghur qurultiyi mu'awin re'isliridin séyit tümtürk, ömer qanat, ümid agahi, esqer jan, dunya Uyghur qurultiyi ijra'iye komitéti mudiri dolqun eysa we d u q ning yawropa parlaméntidiki wekilliridin enwerjan qatarliq rehberler közetküchi süpitide qatnashti.

Biz saylam toghrisida téximu tepsiliy melumat élish üchün bélgiye Uyghur jem'iyitining re'islikige yéngidin saylan'ghan abdulla ömerof we bu saylamgha közetküchi süpitide qatnashqan d u q ning mu'awin re'isi séyit tümtürk ependiler bilen téléfon söhbiti élip barduq.

Abdulla ömerof ependi, özining 3-qétim bélgiye Uyghur jem'iyitining re'islikige saylan'ghanliqini, xelqning bu ümidini yerde qoymay Uyghur mesilisini yawropaning merkizi bolghan biryussélda téximu yuqiri pellige kötürüsh üchün qolidin kelgenni qilidighanliqini éytti. Séyit tümtürk ependi, dunya Uyghur qurultiyining yawropadiki sherqiy türkistan ammiwi teshkilatlirigha bolupmu yawropaning paytexti hésablinidighan biryussélda pa'aliyet élip bériwatqan Uyghur jem'iyitige alahide ehmiyet bérip kéliwatqanliqini buning seweblirini bayan qilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.