Istanbulda dunya Uyghur qurultiyi toghrisida melumat bérish yighini ötküzüldi

Ixtiyariy muxbirimiz arslan
2017-12-27
Élxet
Pikir
Share
Print

23-Dékabir küni istanbulda dunya Uyghur qurultiyi toghrisida melumat bérish yighini échildi. Yighin'gha istanbuldiki sherqiy türkistan ammiwi teshkilatlirining rehberliri, jama'et erbabliri, yurt chongliri bolup köp sanda kishi qatnashti.

Yighinda dunya Uyghur qurultiyining yéngidin saylap chiqilghan bir qisim rehberliri d u q ning buningdin kéyinki xizmetliri we pa'aliyetliri toghrisida doklat berdi. 

Yighinda dunya Uyghur qurultiyining mu'awin re'isi erkin ekrem, d u q ijra'iye komitéti re'isi ömer qanat, neshriyat bölümining mudiri abdujélil turan, sherqiy türkistan ölimalar birlikining re'isi doktor atawullah shehyari, sherqiy türkistan ma'arip we hemkarliq jem'iyitining re'isi hidayetullah oghuzxan we bashqilar söz qildi.

Yighinda aldi bilen "Qur'an kerim" tilawet qilindi we ötken yili istanbulda wapat bolghan merhum dini alim abdulhekimxan mexsumning rohigha du'alar oquldi. 

Arqidin dunya Uyghur qurultiyining mu'awin re'isi doktor erkin ekrem ependi söz qilip, d u q toghrisida melumat berdi we qurultayning bundin kéyin qilmaqchi bolghan bir qisim xizmet pilanlirini tonushturdi. Erkin ekremning éytishiche, qurultay buningdin kéyin türkiye parlaménti, hökümiti we bashqa her qaysi jem'iyetler bilen uchrishish we alaqe ornitishni kücheytidiken. 

D u q ijra'iye komitétining re'isi ömer qanat ependimu söz qilip, dunya Uyghur qurultiyining kelgüsi xizmet nishanliri toghrisida melumat bérip, qurultayning amérika we yawropa döletliri, hökümet we parlaméntliri bilen shuningdek her qaysi kishilik hoquq teshkilatliri bilen bolghan alaqini qanat yayduridighanliqini, jümlidin parlaméntlarda Uyghur dostluq guruppisi qurushni aktiplashturidighanliqini tekitlidi.

Yighinda söz qilghan sherqiy türkistan ölimalar birlikining re'isi doktor atawullah shehyari dunya Uyghur qurultiyining Uyghurlarning xelq'araliq siyasiy teshkilati ikenlikini shundaqla d u q ning xizmetlirini pütün imkaniyiti bilen qollaydighanliqini bildürdi. 
Istanbulidiki sherqiy türkistan ma'arip we hemkarliq jem'iyitining re'isi hidayetulla oghuzxanmu söz qilip, özlirining dunya Uyghur qurultiyi bilen yéqindin hemkarliship kéliwatqanliqini, bundin kéyinmu dawamliq hemkarlishidighanliqini bildürdi. Uning tekitlishiche, Uyghurlarning nöwettiki qiyin weziyiti Uyghur teshkilatliri, jem'iyetliri we xelqi arisidiki ömlükni we ittipaqliqni téximu kücheytishni telep qilidighanliqini eskertti.

Ikki sa'et dawam qilghan bu yighinning axirida yene dunya Uyghur qurultiyi ijra'iye komitétining re'isi ömer qanat yighin ehlining qurultay toghrisida sorighan her xil so'allirigha jawab berdi. So'allar ichide "Dunya Uyghur qurultiyining néme üchün sherqiy türkistan qurultiyi dep atalmighanliqi" heqqidimu so'allar bar bolup, bu hem uzundin buyan köp tekitlinip, kishilerni qiziqturup kéliwatqan so'allarning biri iken. 

Yighinda yene istanbuldiki sherqiy türkistan wexpining bash katipi doktor ömer qul, finlandiye Uyghur islam merkizining re'isi doktor memet'éli qari, yawropa sherqiy türkistan ma'arip jem'iyitining bash katipi eysa sawut, d u q ichki ishlar komitétining mudiri hamutxan köktürk, yurt chongliridin séyit taranji qatarliqlar söz qilghan bolup, ularmu öz imkaniyetliri da'iriside dunya Uyghur qurultiyining pa'aliyetlirige yardemde bolidighanliqini we hemkarlishidighanliqini tilgha aldi.

Melum bolushiche, bu dunya Uyghur qurultiyining istanbuldiki mutleq köp qisim asasiy Uyghur ammiwi teshkilatliri we jem'iyet rehberliri bilen bir arigha kélip, öz-ara hemkarlishish, köz qarash almashturush we kelgüside némilerni qilish qatarliq türlük mesililer boyiche yéqinqi yillardin buyan élip barghan muhim pa'aliyetliridin biri iken.

Toluq bet