Xitayning Uyghur rayonidiki 33 saqchi "Qehrimani" ning 17 nepiri yürek késili qozghilip ölgen

Muxbirimiz shöhret hoshur
2016-04-06
Élxet
Pikir
Share
Print
Xitay j x tarmaqliri 1-aprél küni élan qilghan inqilabiy qurbanlar tizimlikidin melum bolushiche, tizimliktiki Uyghur rayonigha tewe 33 neper saqchining 17 nepiri yürek késili bilen ölgen.
Xitay j x tarmaqliri 1-aprél küni élan qilghan inqilabiy qurbanlar tizimlikidin melum bolushiche, tizimliktiki Uyghur rayonigha tewe 33 neper saqchining 17 nepiri yürek késili bilen ölgen.
mps.gov.cn

Xitay j x tarmaqliri 1 ‏-aprél küni élan qilghan inqilabiy qurbanlar tizimlikidin melum bolushiche, tizimliktiki Uyghur rayonigha tewe 33 neper saqchining 17 nepiri yürek késili bilen ölgen. Bu ehwal mundaq ikki nuqtidin Uyghur siyasiy közetküchilerning diqqitini qozghidi: birinchi, basturush heriketliride rol élish saqchilarni wijdan azabigha muptila qilghan bolushi mumkinmu? ikkinchi, xitay da'irilirining ülge tiklesh-qehriman yaritish éhtiyaji adettiki ishlarnimu ulughlashturushqa qistawatamdu?

Mezkur tizimliktin melum bolushiche, Uyghur rayonidiki inqilabiy qurban dep nam bérilgen we qehrimanlar tizimlikige kirgüzülgen 33 neper saqchidin 17 nepiri xizmet waqtida yürek késili qozghilip ölgen. Mesilen, konasheher nahiyilik saqchi idarisining xadimi abduqadir abdukérim bir gumandarni soraq qiliwétip, soraq dawamida yürek késili qozghalghan we doxturxanida jan üzgen. Qanun doxturi abduweli abdukérimmu melum bir jesetni tekshürüwétip yürek késili qozghalghan we hayatidin ayrilghan. Bulardin bashqa yene ablimit toxtiniyaz, éziz erkin, mexetjan yimit qatarliq Uyghur saqchilar, fenxeypo, ma jingshyung, yijün qatarliq xitay saqchilar bolup jem'iy 17 neper saqchi, atalmish "Qehrimanlar" ning yérimidin köpreki yürek késili bilen ölgen.

Biz bügün bu témida amérikidiki siyasiy közetküchilerdin uchqunjan ependi bilen doktor qahar barat ependilerni ziyaret qilduq.

5‏-Iyul weqesidin kéyin belgilik sandiki Uyghur saqchilarning xizmettin istépa bergenlikini eslep ötken siyasiy közetküchi uchqunjan ependi, yuqiriqi yürek késili bilen ölgen Uyghur saqchilarning köz aldidiki wehshiylik we heqsizliqni wijdani qobul qilalmighanliqi sewebidin jan üzgen bolush éhtimalliqini ilgiri süridu.

U yene Uyghur rayonidiki saqchilarning, bolupmu Uyghur saqchilarning xizmitidin istépa berse, xitay dölet bixeterlik saqchilirining diqqet merkizige aylinidighanliqini, yene bashqiche bir awarichilik we xewp-xeterge duch kélidighanliqini otturigha qoydi.

Siyasiy közetküchi qahar ependining qarishiche, dunyada kommunizm nezeriyisi meghlup bolghandin kéyin, xitayning ilgiriki kona qehrimanliri, ülgiliri qimmitini yoqatti, xitay jem'iyitide kishilerni rohiy jehettin algha yétekleydighan, ilhamlanduridighan qehrimanlargha éhtiyaji tughuldi.

Xitay jem'iyitidiki heq we adaletni yaqlap qehrimanliq körsetkenlerni medhiyilesh, ulughlashturush xitay hakimiyitining menpe'itige xilap, shunga xitay da'iriliri qehrimanlarni sün'iy halda yasap chiqishqa, adettiki ishlarni, adettiki kishilerni ulughlashturushqa mejbur bolmaqta.

Her ikki közetküchining qarishiche, xitay dégendek, éghiz xizmet salmiqi, yeni rayondiki axiri üzülmigen qarshiliq heriketliri, siyasiy öginish bésimliri bir qisim saqchilarni rastinila halsiratqan we ularning ichidiki salametliki ajizraq bolghanlarning ölümige türtke bolghan bolushi mumkin.

Toluq bet