“1-нөвәтлик шәрқий түркистанлиқлар истратегийилик муһакимә йиғини” күтүлгән мәқсәткә йәттиму?

Ихтиярий мухбиримиз әркин тарим
2017-03-03
Share
sherqiy-turkistanliqlar-2017-uchrishish-xatire.jpg Сипруста “шәрқий түркистанлиқлар истратегийилик муһакимә йиғини” намида өткүзүлгән паалийәткә қатнашқан бир қисим паалийәтчиләр йиғиндин кейин хатирә сүрәттә. 2017-Йили 27-феврал, шималий сипрус.
Photo: RFA

“1-нөвәтлик шәрқий түркистанлиқлар истратегийилик муһакимә йиғини” чәтәлләрдики бир қисим уйғур тәтқиқатчилар, җамаәт әрбаблири, сиясәтчиләр вә паалийәтчиләрниң иштирак қилиши билән 25-февралдин 27-февралғичә шималий сипрус түрк җумһурийитиниң гирнә шәһиридики лордс палас меһманханисида өткүзүлди.

Түркийә истратегийилик чүшәнчиләр институти мутәхәссиси доктор әркин әкрәм әпәнди йиғинниң ечилиш мурасимида қилған сөзидә, йиғинда хәлқара вәзийәтниң нөвәттики йөнилиши вә у пәйда қилидиған иҗабий-сәлбий тәсирләрниң уйғурлар мәсилисигә елип келидиған ақивәтлири һәм буниңға мунасивәтлик чарә-тәдбирләрниң муһакимә қилинидиғанлиқини тәкитлигән иди. Ундақта “йиғиндин күткәнләр қолға кәлтүрүлдиму?” “әркин әкрәмниң бәзи көр қарашлириға йиғин әһли қандақ қарайду?” дегәнгә охшаш соалларға җаваб тепиш үчүн доктор әркин әкрәм вә бу йиғинға иштирак қилған бәзи мутәхәссисләрниң пикрини алдуқ.

Доктор әркин әкрәм әпәнди “1-нөвәтлик шәрқий түркистанлиқлар истратегийилик муһакимә йиғини” ни ечиштин күткән мәқситигә толуқ йетәлмигән болсиму, әмма уйғур дәвасини хәлқара сәвийидә елип бериш җәһәттә мәлум чүшәнчиләргә еришиш имканийитигә игә болғанлиқини билдүрди.

Истратегийә мутәхәссиси доктор әркин әкрәм әпәнди хәлқара вәзийәт тоғрисида тәһлил елип берип, дуня вәзийитиниң өзгириватқанлиқини, хитайға пайдилиқ бәзи вәзийәтләр пәйда болған болсиму, әмма уйғурлар әқлини ишләткәндила өз дәвасида мувәппәқийәт қазиналайдиғанлиқини илгири сүрди.

Германийәдин келип бу учришишқа иштирак қилған дуня уйғур қурултийи баш катипи долқун әйса әпәнди доктор әркин әкрәм әпәндиниң бу қарашлириниң наһайити тоғра бир диагноз икәнликини, хитайниң иқтисадий вә сиясий күчини ишлитип уйғур дәвасиниң алдини тосушқа тиришиватқан болсиму, әмма тосалмайватқанлиқини, уйғур давасида әнә шундақ әқил-идрак ишлитилип, көрүнәрлик мувәппәқийәтләр қолға кәлгәнликини билдүрди.

Түркийәдин келип бу йиғинға иштирак қилған шәрқий түркистан маарип вә һәмкарлиқ җәмийити рәиси һидайәтулла оғузхан әпәндиму бу һәқтә өз қарашлирини оттуриға қойди.

Америкадин келип бу йиғинға иштирак қилған америка уйғур бирликиниң рәиси илшат һәсән әпәнди йетишкән уйғурларниң бир йәргә җәм болуп, дуняниң йөнилишлирини музакирә қилидиған йиғинларни давамлиқ һалда ечиш керәкликини, буниң үнүминиң зор болидиғанлиқини илгири сүрди.

Бу йиғинға америка қошма штатлири, германийә, японийә, австралийә, түркийә қатарлиқ 12 дөләттин 19 киши иштирак қилған болуп, йиғин қатнашқучилири һечқандақ тәшкилат вә гуруһқа вәкиллик қилмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт