Yaponiye Uyghur birliki teshkilatining kyushu shöbisi quruldi

19-Öktebir yaponiye Uyghur birliki teshkilati yighin chaqirip mezkur teshkilatning kyushu shöbisi qurulghanliqini élan qildi.

Yaponiye Uyghur birliki teshkilatidin igilishimizche, mezkur teshkilat da'imiy hey'et ezaliri yighini chaqirip, köp muzakiriler élip barghandin kéyin, teshkilatning kyushu ölkisi fuku'oka shehiridiki tunji shöbisining qurulghanliqini qarar qilghan we shöbe teshkilatning mes'ulluqigha uzundin buyan yaponiyede élip bériliwatqan Uyghur kishilik hoquq pa'aliyetlirige aktip qatniship kéliwatqan we Uyghur mesilisi heqqide köp izden'gen imamura ependini teyinligen.

Ziyaritimizni qobul qilghan yaponiye Uyghur birliki teshkilatining re'isi turmuhemmet hashim kyushu shöbisining qurulghanliqi heqqide toxtaldi.

Yaponiye Uyghur birliki teshkilatining da'imiy hey'et ezasi gülistan ezizi kyushu ölkisining fuku'oka shehiride qurulghan shöbe teshkilatning ehmiyiti toghrisida toxtaldi.

Ilgiri yaponiye özini qoghdash qismida herbiy wezipe ötigen, kéyin, yapon musulmanlirining dewiti bilen islam dinigha kirgen imamura Uyghur mesilisige bolghan özining deslepki qarashliri heqqide toxtilip, mundaq dédi: “Men gézit-zhurnallardin sherqiy türkistandiki Uyghur musulmanlirining ramizan éyida roza tutush we namaz oqushining cheklinidighanliqi toghrisidiki xewerlerni körüp, ularning zulum ichide yashawatqanliqigha köp échinattim. Yaponiyediki issiq hawa kilimatida roza tutush tolimu zor bolsimu, men hemishe Uyghur musulmanlirining zulum ichidimu roza tutup, namaz oqup öz étiqadi üchün xitay kompartiyesidin azab chékiwatqanliqini yadimgha alghinimda, roza tutush we besh waq namaz oqushtin ibaret islami étiqadim téximu küchlinetti. Shunga méning islami étiqadimning küchiyishige Uyghur musulmanlirining tewrenmes islami étiqadi belgilik tesir körsetkenliki üchün, Uyghur musulmanlirigha qolumdin kélishiche yardemde bolush istikide Uyghur dawasi sépige qoshuldum.” dédi.

Yaponiye Uyghur birliki teshkilati kyushu shöbisining mes'uli imamura noh ibrahim axirida özining kyushu rayonida Uyghur dawasini etrapliq élip baridighanliqini bildürüsh bilen birge, bu rayondiki Uyghurlarning özini qollap quwwetlishini ümid qilidighanliqini éytti.

Yaponiye Uyghur birliki teshkilatining re'isi turmuhemmet hashimning bildürüshiche, mezkur teshkilat buningdin kéyin yaponiyening herqaysi jaylirida shöbe teshkilatlarni tesis qilip yaponiyede keng da'iride Uyghur dawasi herikitini élip baridiken.

Yaponiyediki bir qisim xitay tetqiqati mutexessislirining qarishiche, yaponiyening fuku'oka shehiride xitay falunggung muritlirining teshkilati alliqachan tesis qilin'ghan bolup, bu qétimi yaponiye Uyghur birliki teshkilatining kyushu shöbisi bu sheherde qurulghan xitaygha qarshi ikkinchi bir teshkilat hésablinidiken.

Yuqiriqi awaz ulinishidin tepsilatini anglang.