Birleshken döletler teshkilatining 65 - nöwetlik omumiy yighinida kishilik hoquq tekitlendi

Sürette, 20 - séntebir, birleshken döletler teshkilatining bash katipi ban kémun b d t ning 65 - nöwetlik omumiy yighinida herqaysi döletlerdin kelgen rehberlerge échilish nutqi sözlimekte.

U sözide, b d t ning yadro qoralliri we namratliqtin xaliy, téximu yéshil we téximu bixeter bir dunya yaritish üchün xizmet qiliwatqanliqini bildürüp "téximu güzel bir dunya berpa qilish üchün, birleshken döletler teshkilatini kücheytip qurup chiqishimiz kérek," dégen.

Bash katip ban kimun sözide kishilik hoquq mesilisi üstidimu toxtaldi. U, puqralarning hoquqlirini depsende qiliwatqan dölet we hökümetlerni agahlandurup "adalet bolmay turup, tinchliq bolmaydu. Meyli kichik bolsun, meyli chong bolsun, qandaqliki dölet bolushidin qet'iynezer öz puqralirining heqlirini depsende qilidiken, u choqum jazagha tartilidu" dédi.

Birleshken döletler teshkilatining omumiy yighini bir hepte dawam qilidighan bolup, bu yighin herqaysi döletlerning diplomatiyisi üchün muhim sorun'gha aylandi. Dunya iqtisadini yuqiri kötürüsh we tinchliq berpa qilish ,yighinning muhim kün tertipige aylandi.

Yighinda amérika prézidénti barak obamamu muhim söz qildi. U sözide, dunyadiki namratliqini azaytish üchün, namratliqtin qutulushni arzu qilidighan döletler bilen amérikining bundin kéyinmu hemkarlishidighanliqini tekitlidi. Amérika prézidénti nutqida kishilik hoquq we erkinlikning amérikining tewrenmes idiyisi ikenlikini tekitlidi.

U mundaq dédi: "dunyada erkinlik, adalet we tinchliq bolushi üchün, aldi bilen her bir adem öz hayatida erkinlikke, adaletke we tinchliqqa ige bolushi kérek. Bu amérika üchün exlaqiy we emeliy bir mejburiyettur. Xuddi robért kénndiy éytqandek, herqandaq bir guruppa, teshkilat we dölet xuda teripidin yaritilghan qimmetlik insanning menpe'etni qoghdash üchün mewjut bolidu. Shunga biz choqum uniwérsal qimmet qarishi üchün heriketke ötüshimiz kérek. Biz tejribilirimizni chiqish nuqitisi qilip turup shundaq éytalaymizki, puqralirining yuqiridiki hoquqlirini qoghdighanlar bizning yéqin dostimiz, shérikimiz؛ emma uni ret qilghan herqandaq térrorchilar guruppilar we zorawan hökümetler bizning düshminimizdur!"

Obama sözining dawamida, dunyada zorawanliqning, zulumning téxi ayaghlashmighanliqini, puqralarning hoquqlirini depsende qilidighan ehwallarning hélihem mewjut ikenlikini bayan qilip, dunya miqyasida yüz bergen iqtisadiy krizisning kishlik hoquq mesilisige tesir yetküzmesliki kéreklikini tekitlidi.

Amérika prézidénti barak obama sözide amérikining dunyadiki namrat döletlerni namratliqtin qutuldurushning charisi üstide izdiniwatqanliqini we buninggha izchil yardem qilip kelgenlikini bayan qilghan. U mundaq dégen: "insaniyetni énérgiye we ijadchanliqtin mehrum qilidighan yépiq hem chirik iqtisadiy tüzülmilerning zawalliqi üchün, amérika ochuq ashkara hökümet teshkilleshni qollaydighan dunya berpa qilishqa heriket qilip kéliwatidu." U yene, iqtisadiy tereqqiyatning kishilik hoquqni ilgiri sürüshte muhim rol oynaydighanliqini bildürgen.

U sözining axirida, amérikining dunyada démokratiyini ilgiri sürüsh üchün dawamliq xizmet qilidighanliqini, her waqit awazsizlarning awazi bolushqa dawam qilidighanliqini éytti.

U, intérnét erkinliki, uchur - alaqe erkinliki mesilisi üstide toxtilip, amérikining her waqit erkin we ochuq intérnétni, kishilerning öz - ara erkin alaqe qilish, uchurgha érishish erkinlikini qollaydighanliqini bildürdi we birleshken döletler teshkilatidiki herqaysi döletlerni kishilik hoquqni ilgiri sürüsh üchün küch chiqirishqa chaqirdi.

Birleshken döletler teshkilatining omumiy yighini 30 - séntebir ayaghlishidu. Yighinda herqaysi döletlerning öz - ara ayrim uchrishishlirimu élip bérilidu. Buningda amérikining iran, sudan, yemen qatarliq döletler bilen élip bérilidighan uchrishishlirining muhimliqi xewer qilinmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.