Nurul islamning dadisi 'oghlum gunahsiz' dédi

Xitay ediliye tarmaqliri ötken yili 7 ‏- ayning 27 ‏- küni, 17 yashliq nurul islam shérbazini 5 ‏- iyul küni ürümchide yüz bergen weqege chétishliq dep qolgha alghan. Nurul islamning dadisi shérbazxan (Sherbazkhan) pakistanliq bolup, u ürümchide ushshaq tijaret bilen shughullinish arqiliq turmushini qamdap kelgen, nurul islamning anisi pasha'ayim bolsa, xizmettin boshitiwétilgen.
Muxbirimiz eqide
2010-04-22
Share
7-iyul-kuni-at-beyge-mehellisida-tutulghan-yash-Uyghur-osmur-305.jpg Süret, 7 - iyul künidiki ayallar we balilar namayishida tutqun qilinghan yash ösmürlerdin birining xitay saqchiliri teripidin tutup élip kétiliwatqan körünüsh.
RFA Mushtirilirimiz ewetken süret.

Er ‏- ayal ikkeylen, ürümchi sheherlik 3 ‏- ottura mektep toluq ottura ikkinchi yilliqida oquwatqan yalghuz oghli nurul islamni uniwérsitétta oqutush üchün, meyli iqtisadiy jehettin we bashqa tereplerdin bolsun köp bedel töligen, yeni shérbazxan öz wetinini we uruq - tughqanlirini tashlap ürümchide yashashqa mejbur bolghan.

Nurul islam, 1992 ‏- yili 1 ‏- ayning 16 ‏- küni tughulghan. Aqsu wilayetlik ottura xelq sot mehkimisi bu yil 13 ‏- april küni nurul islamni "qatilliqqa urunush, qalaymiqanchiliqqa küshkürtküchilik qilish jinayiti sadir qilghan" dep, müddetsiz qamaq jazasigha höküm qilghan idi, biraq uning anisi pasha'ayimning bildürüshiche, nurul islam baliliq dewridin tartip hazirgha qeder birer kishi bilen jidelliship majra sadir qilip baqmighan, quliqi yumshaq, yuwash we mektep boyiche ela oqughan oqughuchi iken. Oghligha bérilgen jazaning éghir bolup ketkenlikini éytqan pasha'ayim aptonom rayonluq aliy sot mehkimisge erz sunush üchün teyyarliniwatqanliqini bildürmekte.

Nurul islam qolgha élin'ghandin kéyin, öz dölitige qaytip ketken shérbazxan hazir éghir késelge giriptar bolghan, u doxturxanida turup bizning téléfun ziyaritimizni qobul qildi we oghlining gunahsiz ikenlikini bildürdi" :méning balam xitay hökümiti teripidin bihude jazagha tartildi, eger undaq bolmisa, néme üchün xitay da'iriliri ikki künde bir qétim manga téléfun urup, " eger sen balangning mesilisini tashqi dunyagha tarqitishqa urunsang, oghlung téximu éghir ehwalgha qalidu" dep tehdit qilidu? chünki ular özlirining rezil epti - beshirisini yoshurmaqchi" dédi.

Shérbazxan xitay ediliye da'irilirining, nurul islamni sadir qilghan jinayitini iqrar qildi dep ölüm jazasining ornigha müddetsiz qamaq jazasi höküm qilghanliqi heqqide toxtilip, "5 - iyul küni, balam öydin toluq ottura 3 ‏- yilliq sinipigha qobul qilish émtihanigha qatnishish üchün öydin chiqip ketken idi, u émtihanni ayaqlashturup qaytip kélish yolida, kochida namayish yüz bériwatqan peyt bolup, néme weqe yüz bergenlikige qiziqqan oghlum kochida sin alghu léntisigha chüshüp qalghan, ehwal mushu. Men öningdin sen namayishqa qatnashtingmu dep sorighinimda u manga: 'yaq dada, men bek qorqup kettim we derhal öyge qaytip keldim' dep jawab bergen idi. Méningche oghlum qattiq qéyin - qistaq we éghir qiynashlargha berdashliq bérelmey özi üstidin chiqirilghan saxta jinayet xatirisige qol qoydi" deydu.

Shérbazxan yene mundaq deydu: "gunahsiz oghlumni qutuldurush üchün pütün dunyagha iltija qilimen, xitay türmiside yalghuz bir méning oghlumla emes, minglighan, onminglighan gunahsiz Uyghur perzentliri solandi, xitay hökümiti bu xil rezil qilmishlirini toxtitishi kérek, méning pulum yoq, bichare yoqsi'ulmen, emma ishinimenki, adalet aldida oghlum aqlinidu. U téxi yash ösmür, uning yashliqi we hayatining xitayning qara zindan türmiside nabut bolushigha adaletperwer insaniyet dunyasi hergiz yol qoymaydu."

Ömrining axirigha qeder oghlini qutuldurushqa bel baghlighanliqini bildürgen shérbazxan, "men birleshken döletler teshkilati, dunyadiki barliq kishilik hoquq teshkilatlirigha oghlumning béshigha kelgen tragidiyini anglitimen. Xitayning bésimidin hergizmu qorqmaymen, eger ular ayalimdin öch élishqa urunsa, özlirining qanchilik derijidiki rezil bir hakimyet ikenlikini ispatlaydu," dédi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet