Aradadamtudiki yer majirasi dawam qilmaqta

Sürette, uyghur ayalliri.

Aradadamtu ayalliri qayta toplinip, yéziliq hökümet binasida naraziliq bildürgen we ghulja shehirige kirip namayish qilish üchün yolghan chiqqan. Buning bilen yéziliq hökümet 8 neper tutqunni shu küni qoyup bergen.

Ghulja shehirining dadamtu yéza, aradadamtu kentidiki yer majirasi yene dawam qilmaqta. Ikki heptining aldidiki majirada, aradadamtu ayalliri topa ittirish mashinisining aldigha özini étip, hökümetning mejburiy tériqchiliq pilanigha we bu yol bilen yer tartiwélishigha naraziliq bildürgen idi. Weqede 7 neper ayal oxshash bolmighan derijide yarilan'ghan we doxturxanida yatqan idi. Otken heptiki igilishimizde hökümet terep özlirining déhqanlarning iradisige boysun'ghanliqini bildürgen idi.

Emma bügünki igilishimizde, hökümet terepning yuqiriqi qararidin yene yan'ghanliqi melum bolmaqta.

Aradadamtuda 8 kishi tutqun qilin'ghandin kéyin, ayallar qaytidin teshkillinip, yéziliq hökümet binasigha barghan we naraziliqini bildürgen. Ular hökümet tereptin, tutqun qilin'ghanlarni qoyup bérishni hem mejburiy tériqchiliq pilanini bikar qilishni telep qilghan. Ghulja sheherlik ayallar birleshmisi mezkur weqening yüz bergenlikini étirap qilghan bolsimu, tepsiliy melumat bérishni ret qildi. Dadamtu yéziliq partkom we hökümetmu weqe heqqide éghiz échishtin özini qachurmaqta.

Yéziliq saqchi ponkiti déhqanlarni mejburlash we tutqun qilishni sir tutushqa tirishmaqta.

Aradadamtu ayalliri yéziliq hökümet özlirige qulaq salmighandin kéyin, naraziliqini téximu keng - kölemde bildürüsh üchün ghulja shehirige qarap yolgha chiqqan, ayallar yol üstide yene xitay qoralliq qisim eskerliri teripidin tosuwélin'ghan.

Aradadamtu ayallirining izchil we shiddetlik qarshiliqi netijiside hökümet terep 8 neper tutqunni, aridin 16 sa'et ötkende qoyup bergen hem yer i'illiwilish zorawanliqini toxtatqan. Emma hökümet terepning bu qararning axirqi qarar ikenlikige aradadamtuluqlar yene guman bilen qarimaqta.

Aradadamtuda yüz bergen ikki qétimliq yer majirasida ayallarni naraziliq herikitige teshkilligüchi aman'gül isimlik 45 yashliq bir ayal؛ u bu qétimqi weqedin kéyin yene bir qétim soraqqa tartilghan.

Bügün biz silerge aradadamtu kentide dawamlishiwatqan yer majirasi heqqide tepsiliy xewer anglattuq.

Yuqiridiki awaz ulinishidin, bu heqtiki melumatimizning tepsilatini anglaysiler.