Dilber toxti erzini dawamlashturmaqta

Biz ilgiriki anglitishlirimizda, Uyghur élining yeken nahiyisidin dilber toxti xanimning, erkin asiya radi'o istansisining Uyghur bölümige yollighan, yeken saqchixanida tayaq zerbisidin ölgen éri memet tursun tashning ölümi heqqidiki shikayet xétini hem, dilber toxti xanim bilen élip barghan söhbet xatirisini anglatqan iduq.
Muxbirimiz mihriban
2009-06-01
Share
MemetTursun-Tash-Yerken-305 Yeken nahiyisidiki dilber toxti xanimning, yeken saqchixanida tayaq zerbisidin ölgen éri memet tursun tashning ölümidin burunqi balisi bilen chüshken süriti.
Süretni özini ashkarilashni xalimighan birsi RFA ge ewetken.

Bizning xewirimiz bérilgendin kéyin, öz ismini ashkarilashni xalimighan melum kishi, radi'omizning Uyghur bölümige merhum memet tursun tashning hayat chéghidiki resimi hem ölüp ketken chéghida qanun doxturliri teripidin tartilghan resimini yollidi.

Mushu munasiwet bilen biz merhumning ayali dilber toxti xanimni qayta ziyaret qilduq. Ziyaritimiz jeryanida dilber toxti xanim bizge merhumning hayat chéghida tartilghan süritining, merhum ölüp kétishtin 15 kün burun oghli bilen chüshken süriti ikenlikini sözlep berdi.
 
Dilber toxti xanim bizge bu ishning tepsilatini yaxshi bilidighan kishilerdin, memet tursun tashning anisi semerxan obulning téléfon nomurini berdi. Ziyaritimizni qobul qilghan, memet tursun tashning anisi semerxan obul xanim, oghlining naheq ölüp ketkenlikini hem 3 yil jeryanida özlirining erz qilip, hetta béyjingghiche barghanliqini bayan qildi.

Biz dilber toxti hem semerxan obul xanim bergen uchurgha asasen merhumning uruq - tughqanliri, qolum ‏ - qoshniliri, shundaqla bu ishning tepsilatidin xewiri bar hökümet terep ademliridin dilber toxti turushluq ahale komitétining bashliqi alimjan ependi, yeken gülbagh saqchixanining mu'awin bashliqi ablimit qatarliqlarni ziyaret qilduq.

Memet tursun tashning kichik anisi bu délo heqqidiki qarishini mundaq bayan qildi...

Memet tursun tashning ölümi yeken nahiyisi teweside zor inkas qozghighan bolup, weqening tepsilatini hem bu a'ile kishilirining 3 yildin buyan, bu naheq délo ustidin erz qilip kéliwatqanliqini bayan qilghan, memet tursun tashning bir qoshnisi oz pikrini mundaq bayan qildi.

Bu qétim ziyaritimizni qobul qilghan dilber toxti xanim, érining ölümige seweb bolghan solaqxana bashliqi shu tongrénning qeshqer wilayetlik wali mehkimiside ishleydighan bir emeldar tughqini, bu déloning bir terep qilinishigha tosqunluq qiliwatqanliqini, shu sewebtin nurghun kishilerning bu délogha qol tiqishtin bash tartiwatqanliqini, özining erziningmu tosqunluqqa uchrawatqanliqini bayan qilip ötti.

Biz dilber toxtining erz qilish jeryanidiki ishlarni bir qeder yaxshi bilidighan hökümet terep xizmetchiliridin dilber toxti turushluq ahale komitétining bashliqi alimjan ependini ziyaret qilduq.

U bizge memet tursun tashning saqchixanining solaqxanisida soraq jeryanida ölüp ketkenliki weqesidin taza xewiri yoqluqini, emma özining dilber toxti bilen saqchixana otturisidiki muressege qatnashqanliqini bayan qilip ötti.

U söhbet jeryanida, gerche yeken nahiyilik hökümet terepning, dilber toxtini érining délosi ustidin erz qilishtin waz kéchishke mejburlighanliqini inkar qilghan bolsimu, lékin özining hökümet terepke wakaliten dilber toxtigha erz qilishtin waz kéchish heqqide xizmet ishligenlikini bayan qilip ötti.

Biz yeken nahiyilik gülbagh yéziliq saqchixanigha téléfon qilip, ehwal igilimekchi bolghinimizda, saqchixanida ishleydighan xadimlar özlirining yéngidin kelginini, shunga bu délodin xewiri yoqluqini bayan qilishti.

Saqchixana bashliqi ablimit abdurishit bolsa özining 2007 - yili bu idarige yötkilip kelgenlikini, shunga bu ishning tepsilatidin taza xewiri yoqluqini, peqetla memet tursun tashning eyni chaghda doxturxanigha waqtida élip bérilmighanliqi uchun ölüp ketkenlikini bayan qildi.

Emma dilber toxti we memet tursun tashning anisi semerxan obul xanim bizge, saqchilarning memet tursun tashning qorsiqigha tepkini üchün üchiyi üzülüp ketkenlikini, saqchixanidikilerning uning hayati bilen kari bolmighanliqini, eksiche özlirige merhum alliqachan ölüp bolghandin kéyin xewer qilghanliqini mundaq bayan qilghan idi.

Yeken teweside yüz bergen bu délo Uyghur tor betliride bes - munazire qozghighan bolup, ghezeplen'gen kishiler bu dilogha chétishliq bolghan 2 neper xitay saqchisining qanun boyiche jazagha tartilishini telep qilip öz pikirlirini bayan qilghan.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet