بۇلار 27، 28-ئۆكتەبىر كۈنلىرى ئۇيغۇر ۋە تۈرك تەشكىلاتلىرى بىلەن بىرلىكتە قۇربان ھېيت پائالىيىتى ۋە باشقا بەزى پائالىيەتكە قاتناشقاندىن كېيىن، 29-ئۆكتەبىر كۈنى رەسمىي ئۇچرىشىشلارنى باشلىۋەتتى.
ئالدى بىلەن، 29-ئۆكتەبىر كۈنى بېلگىيە ھۆكۈمىتى تارمىقىدىكى مۇساپىرلارغا ياردەم قىلىش تەشكىلاتى مەسئۇللىرى بىلەن ئۇچراشتى. كۆرۈشۈشتە، ئوتتۇرا ئاسىيادىن كېلىپ بېلگىيىدە سىياسىي پاناھلىق تىلىگەن مۇساپىر ئۇيغۇرلارنىڭ مەسىلىسى ئۇلارغا يەتكۈزۈلدى. ئۇلارمۇ مۇساپىر ئۇيغۇرلارغا ياردەم قىلىش ھەققىدە ۋەدە بەردى. بۇرۇندىن تارتىپ ئۇيغۇر مۇساپىر مەسىلىسىگە دىققەت قىلىۋاتقانلىقىنى ۋە بۇندىن كېيىنمۇ كۆڭۈل بۆلىدىغانلىقىنى ئېيتتى.
ئۇلار چۈشتىن كېيىن، ياۋروپا ئىتتىپاقىنىڭ ھۆكۈمىتى ھېسابلىنىدىغان ياۋروپا كومىتېتىنىڭ تاشقى ئىشلار مىنىستىرلىقى مەسئۇللىرى بىلەن كۆرۈشكەن. كۆرۈشۈشتە تاشقى ئىشلار مىنىستىرلىقى مەسئۇللىرىغا ئۇيغۇرلارنىڭ ھازىرقى ۋەزىيىتى، ئىز-دېرەكسىز غايىب بولغان ئۇيغۇرلار مەسىلىسى ۋە كۆچمەن خىتايلارنى شەرقىي تۈركىستانغا يەرلەشتۈرۈش، خىتاينىڭ ئۇيغۇر تىلىنى، كۈلتۈرىنى يوقىتىش ھەققىدىكى قاتتىق قول سىياسىتى ھەققىدە مەلۇمات بېرىلگەن.
ئىگىلىشىمىزچە، ياۋروپا پارلامېنتىدا 2011-يىلى تارىخىي شەھەر قەشقەرنى قوغداپ قېلىش ھەققىدە قارار ماقۇللانغان. ئۇلار بۇ قېتىمقى ئۇچرىشىشتا بۇ قارارنىڭ ئەمەلىيلىشىشى ھەققىدە ياۋروپا كومىتېتىدىن ۋەدە ئالغان.
بىز بۇ ئۇچرىشىشلار ھەققىدە تەپسىلىي مەلۇمات ئېلىش ئۈچۈن دۇنيا ئۇيغۇر قۇرۇلتىيى رەئىسى رابىيە قادىر خانىم قاتارلىقلار بىلەن سۆھبەت ئېلىپ باردۇق.