D u q türkiyidiki partiye we teshkilatlardin yardem telep qildi

Dunya Uyghur qurultiyi 5 - iyul ürümchi qirghinchiliqining 1 - yilliqini xatirilesh üchün 12 dölettiki 20 sheherde 27 türlük pa'aliyet ötküzüsh üchün teyyarliq qilmaqta. Bolupmu türkiyidiki sherqiy türkistan ammiwiy teshkilatliri d u q ning yolyoruqi boyiche, türkiyidiki eng chong ammiwiy teshkilatlarni, her qaysi siyasiy partiyilerni, parlamént ezalirini ayrim - ayrim ziyaret qilip ulardin yardem telep qilmaqta.
Muxbirimiz erkin tarim
2010-06-24
Élxet
Pikir
Share
Print
Süret, dunya uyghur qurultiyi muawin reisi séyit tümtürk ependi we sherqiy türkistan medeniyet we hemkarliq jemiyiti enqere shöbisining mesuli xeyrullah efendigil ependiler büyük birlik partiyisi bashliqi yalchin topchuni ziyaret qiliwatqan körünüsh.
Süret, dunya uyghur qurultiyi muawin reisi séyit tümtürk ependi we sherqiy türkistan medeniyet we hemkarliq jemiyiti enqere shöbisining mesuli xeyrullah efendigil ependiler büyük birlik partiyisi bashliqi yalchin topchuni ziyaret qiliwatqan körünüsh.
RFA Photo / Erkin Tarim

Dunya Uyghur qurultiyi mu'awin re'isi séyit tümtürk ependi we sherqiy türkistan medeniyet we hemkarliq jem'iyiti enqere shöbisining mes'uli xeyrullah efendigil ependilerdin terkip tapqan bir hey'et 6 - ayning 23 - küni türkiyining eng chong ammiwiy teshkilatliridin biri bolghan kamu - sen yeni kadirlar uyushmisining bashliqi birjan aqyildiz, salametlik xizmetliride ishlewatqan ishchilar uyushmisi bashliqi mustafa bash, türkiye métal ishchiliri uyushmisi bash sékrétari pewrul qawlaq we büyük birlik partiyisi bashliqi yalchin topchu qatarliq kishilerni ziyaret qilip ulardin yardem telep qildi. Ular hey'etni qizghin kütüwélip 5 - iyul ürümchi qirghinchiliqining 1 - yilliqini xatirilesh pa'aliyitige özlirining shundaqla uyushma ezaliriningmu aktip qatnishidighanliqini, shundaqla maddi we meniwiy jehettin yardem qilidighanliqini éytti.

Türkiye salametlik ishchiliri uyushmisi bashliqi mustafa bashoghlu 5 - iyul ürümchi qirghinchiliqining 1 - yilliqini xatirilesh pa'aliyetlirini qollap ‏ - quwetleydighanliqini anglitip mundaq dédi: "türkiye bash ministiri bu dawagha ige chiqsa bolatti. Siler hakimiyet béshidiki adalet we tereqqiyat partiyisige béringlar, ular bu dawagha ige chiqsa bolidu. 5 - Iyulda men silerge yardem qilimen, qolumdin kelgenni qilimen. Men burunmu xitay elchixanisining aldida namayishqa qatniship xitay elchixanisining ishikige qaragülchembirek qoyghan idim. Silerning 5 - iyulni xatirilesh üchün élip barghan pütün pa'aliyetliringlargha aktip qatnishimiz. Biz her zaman sherqiy türkistanliqlarning heqliq dawasini qollap ‏ - quwetleymiz."
 
Kéyin d u q hey'iti türkiye büyük birlik partiyisi bashliqi yalchin topchu ependini partiye merkizidiki ishxanisida ziyaret qildi. D u q hey'itini partiye rehberliri qizghin kütüwaldi. U sherqiy türkistan dawasini qollaydighanliqini anglitip mundaq dédi: "qimmetlik dostlar, sherqiy türkistan medeniyet we hemkarliq jem'iyiti bashliqi séyit tümtürk ependi bashchiliqidiki hey'etni merkizimizde kütüwalghanliqim üchün nahayiti xoshal boldum. Adri'atik déngizidin seddichin'giche bolghan türk islam zéminida esirlerdin béri qan tökülmekte. Sherqiy türkistanda ötken yili 5 - iyulda xitaylar élip barghan qirghinchiliq téxi yadimizdin chiqqini yoq. Sherqiy türkistanda xitaylar esirlerdin béri qan töküwatidu, buni dunya döletliri toxtitishi kérek. Partiyimiz burundin tartip sherqiy türkistanliqlarning heqqaniy dawasini qollap ‏ - quwwetlimekte. Buningdin kéyinmu qollaymiz. 5 - Iyul qirghinchiliqining 1 - yilliqini xatirilesh pa'aliyitinglargha aktip qatnishimiz we qollap ‏- quwetleymiz."

D u q mu'awin re'isi séyit tümtürk ependi bashchiliqidiki hey'etning türkiyidiki siyasiy partiye we ammiwiy teshkilatliridin yardem telep qilish ziyariti axirlashqandin kéyin mikrafonimizni siyit tümtürk ependigimu uzattuq.

Yuqiridiki awaz ulinishidin, bu heqtiki söhbitimizning tepsilatini anglaysiler.

 
Toluq bet