تورونتودا بۈيۈك مۇتەپەككۇر شائىر ئەلىشىر ناۋايى تەۋەللۇتىنىڭ 569 يىللىقى خاتىرىلەندى

6 - فېۋرال، كانادانىڭ تورونتو شەھىرىدە ئۇلۇغ مۇتەپەككۇر شائىر مىرزا ئەلىشىر ناۋايى تەۋەللۇتىنىڭ 569 - يىلى خاتىرىلەندى. خاتىرىلەش مۇراسىمىنى كانادادا پائالىيەت ئېلىپ بېرىۋاتقان تۈركىستان يۇرتداشلار جەمئىيىتى تەشكىلاتى تەشكىللىگەن.
ﻣﯘﺧﺒﯩﺮﯨﻤﯩﺰ ﮔﯜﻟﺸﻪﻥ ﺋﺎﺑﺪﯗﻗﺎﺩﯨﺮ
2010-02-08
Share
Elishir-Nawayi-Ilimi-Yighini-Enqere-305.jpg 2006 - ﻳﯩﻠﻰ ﺋﺎﭘﺮﯦﻠﺪﺍ، ﺋﯚﺯﺑﯧﻜﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﺗﯜﺭﻛﯩﻴﯩﺪﻩ ﺗﯘﺭﯗﺷﻠﯘﻕ ﺋﻪﻟﭽﯩﺨﺎﻧﯩﺴﻰ ﯞﻩ ﺋﻪﻧﻘﻪﺭﻩ ﺋﯘﻧﯩﯟﯦﺮﺳﯩﺘﯧﺘﻰ ﺋﻮﺭﺗﺎﻗﻠﯩﺸﯩﭗ ﺩﺍﯕﻠﯩﻖ ﺷﺎﺋﯩﺮ، ﺩﯙﻟﻪﺕ ﺋﻪﺭﺑﺎﺑﻰ ﺋﻪﻟﯩﺸﯩﺮ ﻧﺎﯞﺍﻳﯩﻨﯩﯔ ﺗﯘﻏﯘﻟﻐﺎﻧﻠﯩﻘﯩﻨﯩﯔ 565 ﻳﯩﻠﻠﯩﻘﯩﻨﻰ ﺧﺎﺗﯩﺮﻟﻪﺵ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﯚﺗﻜﯜﺯﮔﻪﻥ ﺑﻮﻟﯘﭖ، ﺳﯜﺭﻩﺕ ﺷﯘ ﻳﯩﻐﯩﻨﺪﯨﻦ ﺑﯩﺮ ﻛﯚﺭﯛﻧﯜﺵ.
RFA File

بۇ تەشكىلاتنى بۇندىن بىرقانچە يىل ئىلگىرى ئۆزبېكىستاندا يۈز بەرگەن ئەنجان قانلىق ۋەقەسىدە، ئۆزبېكىستان دائىرىلىرى تەرىپىدىن ھاياتى خەۋپ ئاستىدا قالغاندىن كېيىن، كاناداغا كېلىپ يەرلەشكەن ئۆزبېك زىيالىيلىرى تەشكىللىگەن.

خاتىرىلەش مۇراسىمىغا تورونتودا ياشاۋاتقان تۈركلەر، ئۆزبېكلەر، تۈركمەنلەر، ئەزەربەيجانلار، قازاقلار ۋە ئۇيغۇرلار بولۇپ 200 دىن ئارتۇق كىشى قاتناشتى. خاتىرىلەش مۇراسىمىدا مۇتەپەككۇرنىڭ 15 - ئەسىر تۈرك ئەدەبىياتىغا قوشقان ئالەمشۇمۇل تۆھپىلىرى مەدھىيىلەندى ۋە ئۇنىڭ شېئىرلىرى ئوقۇپ ئۆتۈلدى.

ئۇلۇغ مۇتەپەككۇر شائىر ئەلىشىر ناۋايى تەۋەللۇتىنىڭ 569 يىللىغىنى خاتىرىلەش مۇراسىمىغا، تورونتو شەھەر باشلىغىنىڭ ياردەمچىسى جون پاركېرمۇ قاتناشتى ۋە سۆز قىلدى. ئۇ، سۆزىدە ئىنگلىزلار ئۈچۈن شېكىسپېر ۋە جېئوففېرىي چوسېر (Geoffrey Chaucer ) قانچىلىك مۇھىم بولسا، تۈركى مىللەتلىرى ئۈچۈنمۇ ئەلىشىر ناۋايىنىڭ شۇنچىلىك مۇھىملىقىنى مۇئەييەنلەشتۈردى.

خاتىرىلەش مۇراسىمىدا تۈركىستان يۇرتداشلار جەمئىيىتىنىڭ تورونتودىكى باشلىقى پەخىردىن تاجىمۇرات سۆز قىلىپ، تارىختا تۈركىستان دەپ ئاتالغان بۇ كەڭرى جۇغراپىيىلىك زېمىننىڭ ئەلىشىر ناۋايىدەك ئاجايىپ بۈيۈك ئالىم ۋە مۇتەپەككۇرلارنى يېتىشتۈرگەن بىر زېمىن بولغانلىقىنى ئەسلىتىپ ئۆتتى.

ئەلىشىر ناۋايىنى ئۆز نۆۋىتىدە ئۇيغۇرلارمۇ ئۆزلىرىنىڭ ئۇلۇغ مۇتەپەككۇرى سۈپىتىدە ئۇلۇغلاپ كەلمەكتە. ئەلىشىر ناۋايىنىڭ ئەسەرلىرى ئەينى يىللاردا ئوتتۇرا ۋە ئالىي مەكتەپلەر دەرسلىكلىرىگە كىرگۈزۈلگەندىن باشقا، 80 - يىللاردىن ئېتىبارەن ئۇيغۇر دىيارىدا ئۇنىڭ ئەسەرلىرىنى توپلاش، رەتلەش، ۋە تەرجىمە قىلىش ئىشلىرىمۇ سىستېمىلىق ئېلىپ بېرىلغان.

ئۇيغۇر زىيالىيلىرىدىن تېيىپجان ئېلىيۇپ، ئابدۇرېشىت ئىسلام، قۇربان بارات ۋە رەھمۇتۇللا جارى قاتارلىقلار ئەلىشىر ناۋايىنىڭ ئەسەرلىرىدىن "خەمسە 1" ۋە "خەمسە 2" لەرنى ھازىرقى زامان ئۇيغۇر تىلىغا تەرجىمە قىلىپ نەشر قىلدۇرغان.

تورونتودا ئۆتكۈزۈلگەن ئۇلۇغ مۇتەپەككۇر مىرزا ئەلىشىر ناۋايى تەۋەللۇتىنىڭ 569 يىللىغىنى خاتىرىلەش مۇراسىمىغا، تورونتودا ياشاۋاتقان ئۇيغۇر سەنئەتكارلىرىمۇ قاتناشتى ۋە نەپس ئۇيغۇر دولان ئۇسۇلىنى ئورۇنلاپ مۇراسىمنىڭ كەيپىياتىنى يۇقىرى باسقۇچقا كۆتۈردى.

يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت