Uyghur yashliri: biz dunyagha chéchilip ketsekmu, uyushalaydighanliqimizni xitaygha tonutup qoymaqchi

Uyghur yashlirining tunji nöwetlik “Erkinlik longqisi” ni talishish xelq'araliq putbol musabiqisini orunlashturghuchi teshkillik apparat bolghan dunya Uyghur qurultiyining yashlar komitéti re'isi gheyur ependi, Uyghur yashliri üchün mezkur xelq'araliq putbol musabiqisining dunyaning her qaysi jayliridiki Uyghur yashlirining teshkillinishide muhim ehmiyetke ige ikenlikini bildürdi. Musabiqe gollandiyining rottérdam shehiride 27-iyuldin 31-iyulghiche dawam qilidiken. Gheyur ependi yene musabiqining konkrét xizmetliri shundaqla iqtisadiy we bashqa qiyinchiliqlirining qandaq hel qiliniwatqanliqini qisqiche chüshendürdi.

Elwette dölet halqighan bundaq kölemlik bir musabiqini uyushturush üchün nurghun teyyarliq we teshkiliy xizmetler ishlinishi zörür, bolupmu sahibxaniliqni öz üstige alghuchilar mezkur musabiqining ongushluq ötküzülüshide eng zor mes'uliyetni öz üstige alghan bolidu, qéni undaqta gollandiyidiki teyyarliqlar pütüp qaldimu, buni gollandiyidiki musabiqe meydani we arqa sep orunlashturushqa mes'ul gollandiye Uyghur yashliri putbol komandisining bashliqi élshattin sorap köreyli.

Élshatning tonushturushiche, teyyarliq xizmetliri Uyghur yashlirining ortaq küch chiqirishi bilen ongushluq dawam qiliwatqan bolup, rottérdamdiki putbol meydanida ötküzülidighan Uyghur yashlirining bu tunji nöwetlik putbol musabiqisining téxnika sewiye ölchimini xelq'araliq putbol musabiqining ölchemlirige yéqinlashturush, meydan adilliqigha kapaletlik qilish üchün gollandiyilik kespiy répirilar teklip qilin'ghan shundaqla bezi dangliq putbol mahirliriningmu sherep méhmini süpitide qatnishishini qolgha keltürüsh üstide izdiniwatqan iken. Élshat, mezkur musabiqe Uyghur yashlirigha ümid we küch ata qilidu, dep ishinidighanliqini bildürüp “Biz xitaygha, dunyagha qanche chéchilip ketken bolsaqmu, hamini uyushalaydighanliqimizni tonutup qoymaqchimiz” deydu.

Uyghur yashlirining dunyawi putbol musabiqisige teyyarliq körüwatqanliqi pütün dunyadiki Uyghurlarni hayajan'gha salmaqta, her qaysi döletlerdiki Uyghurlar, bu musabiqe pa'aliyitining ghelibilik ötküzülüshi üchün öz qabiliyitige yarisha küch qoshushni izdimekte. Gollandiyidiki Uyghur pa'aliyetchiler sépige yéngidin qétilghan bolsimu, küch quwwiti urghup turghan, bir qisim talantliq yashlar hetta bu musabiqining “Erkinlik longqisi” naxshisini ishlep püttürüsh aldida iken. Gollandiyidiki özliri teyyarlighan awaz élish öyide jiddiy xizmet qiliwatqan ilyas bilen tahirjan putbol naxshisining deslepki nusxisini ishlep püttürgenlikidin hayajanliniwatqan bolsimu, hazirche bu naxshini anglighuchilirimizdin sir tutushni muwapiq kördi.

Dunyaning her qaysi jayliridiki Uyghur yashlirining gollandiyining rottérdam shehiridiki yéshil meydan'gha jem bolup ötküzidighan bolghusi top musabiqe pa'aliyetlirining teyyarliqliri ongushluq dawamlishiwatqandek körünidu, elwette istansimiz muxbirliri mezkur musabiqe ehwaligha teqezza boluwatqan ixlasmenlirimizni chet'ellerdiki Uyghurlarning bolghusi bu katta pa'aliyitidin toluq xewerdar qilishqa tirishimiz.