Gollandiyide yashawatqan Uyghurlar mirzahid amanullaning paji'esi heqqide toxtaldi

Weten-xelqini séghinish, milliy we diniy kimlikige intilish, insanliq qimmet, kishilik hayat, menilik we köngüllük yashash yolida, muhajirettiki ghéribliq azabini untushni meqset qiliwatqan musapir Uyghurlar özliri yashawatqan yerliridiki wetendashliri bilen dawamliq uchriship turidighan türlük sorunlarni köpeytmekte. Jümlidin gollandiyining amistérdam shehiride yashawatqan Uyghur yigitliri “Qoshna-xulumlar uchrishishi” namliq bir sorunni hazirlap, dawam qiliwatqan bolup, bu qétimqi pa'aliyiti özgiche bolghan.

Bir qanche aydin biri dawam qiliwatqan öz-ara pikir almashturush, öginish we dostlishish meqset qilin'ghan “Qoshna-xulumlar uchrishishi” namliq yighilishida toplashqan gollandiyining amistérdam shehiridiki bir qisim muhajir Uyghurlar xitay saqchiliri teripidin öltürülgen 12 yashliq Uyghur ösmür mirzahid amanullaning rohigha du'a qildi we bu wehshiylikni tenqidlidi.

Mezkur pa'aliyet ikki heptide bir qétim jüme namizidin kéyin taki sham namizigha qeder ishtirakchilarning öylirige nöwet bilen yighilip élip bériliwatqan ixtiyari pa'aliyet bolup, pa'aliyette öginish pursitige érishelmigen din, siyaset, erkin munazire we öz-ara ittipaqlishish qatarliq kishilik hayatta kem bolsa bolmaydighan témilar mezmun qilinip kélinmekte.

Bu qétim mirzahid amanulla shahyarning paji'esidin ghezeplen'gen sorun ehli, asasliq témisini bu mesilige merkezleshtürüp, aldi bilen merhumning rohigha atap qur'an oqudi. Merhumgha we uning a'ile tawabi'atlirigha du'ayi-salamlar yollidi. Ziyaritimizni qobul qilghan pikir bayan qilghuchilar birdek, bundaq weqelerge qarita küchlük inkasini bildürdi.