Pakistandiki ömer Uyghur wexpi dunya Uyghur qurultiyi namidin nurul islam a'ilisidin hal soridi

Ömer Uyghur wexpi pakistandiki Uyghur balilar üchün ana til mektipi qurup bérish we bashqa pa'aliyetliri arqiliq, pakistandiki Uyghurlar arisida zor tesir qozghighan idi.
Muxbirimiz méhriban
2011-12-23
Élxet
Pikir
Share
Print
Sherbazxan bilen oghli nurul islam sherbazning ata-baliliq ispati.
Sherbazxan bilen oghli nurul islam sherbazning ata-baliliq ispati.
RFA

22 - Dékabir küni ömer Uyghur wexpi yene ötken ayda xitay türmiside namelum sewebler tüpeylidin ölgen, nurul islamning pakistandiki a'ilisige bérip, dunya Uyghur qurultiyi namidin uning dadisi sherbazxandin hal soridi.

2009 - Yili 5 - iyul ürümchi weqeside qolgha élinip, 17 yéshidila muddetsiz qamaq jazasigha höküm qilin'ghan nurul islamning dadisi pakistan puqrasi bolup, nurul islam ötken ayda sirliq halda xitay türmiside ölgen idi.

Pakistandiki ömer Uyghur wexpining mes'ulliridin abduqéyim ependi bügün radi'omiz ziyaritini qobul qilip, wexpidikilerning nurul islam ölümining 40 künlük neziri künide, wexpe mes'uli ömer ependining bashchiliqida, nurul islamning pakistandiki dadisi sherbazxan a'ilisidin hal sorighanliqini bildürdi.

Abduqéyim ependi öz bayanida, ömer Uyghur wexpidikilerning, dunya Uyghur qurultiyi re'isi rabiye qadir xanim hem dunya Uyghur qurultiyi bash katipi dolqun eysa ependilerning xitay türmiside ölgen nurul islamning pakistandiki a'ilisige yazghan teziye xétini, nurul islamning dadisi sherbazxan a'ilisidikilerge yetküzgenlikini bildürdi.

Abduqéyim ependi yene, nöwette nurul islamning dadisi sherbazxan ependining xitayning pakistandiki elchixanisining türlük bésimlirigha perwa qilmay, nurul islamning ölüm sewebini éniqlashni telep qiliwatqanliqini bildürdi.

Abduqéyim ependining bayan qilishiche, nurul islam qolgha élin'ghandin kéyin, uning dadisi sherbazxan ependi köp qétim xitay hökümitidin oghlini qoyup bérishni telep qilghan. Xitayning pakistandiki elchixanisining li we wang famililik xadimliri, sherbazxan'gha uning chet'el metbu'atlirigha oghli nurul islamning qolgha élin'ghanliq weqesi heqqide uchur bermeslik sherti bilen, nurul islamni türmidin qoyup bérishke yardem qilidighanliqini bildürgen bolsimu, emma xitay hökümet da'iriliri nurul islamni yenila muddetsiz qamaq jazasigha höküm qilghan. Ötken ayda nurul islam türmide tuyuqsiz ölüp ketkendin kéyin, xitayning pakistandiki elchixana xadimliri sherbazxan a'ilisidikilerni yene agahlandurup, nurul islam ölümi heqqidiki xewerlerni xelq'ara metbu'atlargha bermeslik heqqide dawamliq tehdit salghan.

Abduqéyum ependi sözining axirida, pakistandiki ömer Uyghur wexpining mes'uli ömer ependining nurul islam ölümi heqqide radi'omizgha bergen bayanatini yetküzdi.

Ömer ependi radi'omizgha bergen bayanatida, pakistandiki ömer Uyghur wexpining nurul islamning dadisi sherbazxan bilen birlikte, xitayning pakistandiki elchixanisidin xitay türmiside bi'ejel ölgen nurul islamning ölüm sewebini dawamliq sürüshte qilidighanliqini, shundaqla xelq'ara kishilik hoquq teshkilatliridin hem gherb démokratik döletliridin xitay türmiside öz ejilisiz ölüp kétiwatqan Uyghur mehbuslirining ehwaligha köngül bölüshke chaqirghanliqini bildürgen.

Toluq bet