Оғлини елип қачқан хитай қарақчи үстидин әрз қиливатқан нурунгүл тохти қамақта

35 яшлиқ бир ана, оруқ, егиз бойлуқ гүзәл бир ханим мушу күнләрдә учтурпан қамақханисида койза-кишәнлик һаләттә хитай сақчилири тәрипидин сорақ қилинмақта.
Мухбиримиз шөһрәт һошур
2013-01-11
Елхәт
Пикир
Share
Принт
Рәсимдә нурунгүл тохти 9 яшлиқ оғли билән. 2011-Йили 25-декабир, бейҗиң.
Рәсимдә нурунгүл тохти 9 яшлиқ оғли билән. 2011-Йили 25-декабир, бейҗиң.
RFA/Shohret Hoshur

У ким? у немә ишларни қилған?

Оғлини хитай қарақчиниң қолидин сақчиларниң ярдимисиз қутқузуш, қарақчини җазалимиған далйән сақчи органлири үстидин бейҗиңға әрз сунуш, учтурпан сақчилири бейҗиңдин мәҗбурий елип маңғанда пойиздин сәкрәп қечиш, бейҗиңдики дөләт органлири әрзигә қулақ салмиғанда, чәтәл консулханилири вә б д т дәрвазиси алдида хитай дөлити үстидин шикайәт қилиш, үчтурпандики йәрлик даириләрниң чириклики вә ярамсизлиқини йүзидин-йүзигә әйибләп әл-җамаәтниң алдида әдипини бериш‏, мана булар, мәһбус нурунгүл тохтиниң йеқинқи 3 йиллиқ һаятидики унтулмас мәнзириләрдур.

Бу мәнзириләр нурунгүл тохтиниң әл-җамаәт ичидики иззәт-һөрмитини йүксәлткән болса, бейҗиң вә үчтурпандики алақидар хитай даирилириниң оғисини қайнатқан. Шуңа у 6 айдин бери қамақта.

Җараңлиқ сөзлири билән радио аңлиғучилиримизға тонушлуқ болған нурунгүл тохтиниң 6 айдин бери учури елинмиғандин кейин, йәрлик аһалиләргә телефон қилдуқ. Аһалиләрдин бири униң бултур 6-айниң 4-күни тутуп кетилгәнликини вә тутулуш сәвәбиниң аилисигә билдүрүлмигәнликини ейтти.

Биз бу учурниң тоғра-хаталиқини ениқлаш үчүн, нурунгүл тохтини бейҗиңдин тутуп кетиш вә назарәт қилиш ишлириға арилашқан бир сақчи хадимиға телефон қилдуқ. Сақчи хадими дәсләптә соалимизға җаваб беришни рәт қилди, арқидин наһийилик җ х идарисидин йолйоруқ сориғандин кейин, соалимизға қисмән җаваб бәрди. Униң ашкарилишичә, нурунгүл тохти дөләт бихәтәрликигә хәвп йәткүзүш гумани билән қолға елинған. У қолға елинғиниға 6 айдин ашқан болсиму, үстидин техи сот ечилмиған, сорақ вә тәкшүрүш йәнила давамлашмақта.

Сақчи хадими нурунгүлниң делосиниң тәпсилати һәққидә мәлумат бәрмиди. Әмма нурунгүл тохти қолға елиништин бурун игилигән учурлиримиздин мәлум болушичә, учтурпан наһийилик сақчи идарисидин икки киши, бултур 5-айниң 25-күни униң билән сөһбәт өткүзгән, сөһбәт давамида улар, униң бейҗиңдики башқа әрздарлар билән тәшкилий мунасивити бар-йоқлуқини сориған вә улар һәққидә мәлумат игилигән; униң йәнә, бейҗиңдики чәтәл консулханилири, б д т ишханисиға бериш җәряни һәққидиму мәлумат игилигән вә бу сөһбәттин 10 күн кейин сөһбәтниң хуласисини билдүридиғанлиқини ейтқан.

Мана бу учурлардин қариғанда, нурунгүлниң мәркизи интизам тәкшүрүш идариси алдида сақчилар билән такаллашқанлиқи вә б д т ишханиси алдида әрздарлар билән бирликтә топлишип шикайәт ейтқанлиқи, униң аталмиш җинайитигә пакит һесабланған. Йәнә бәзи әһвалдин хәвәрдар кишиләрниң билдүрүшичә, учтурпан наһийә рәһбәрлири аваричиликтин қутулуш үчүн нурунгүлни түрмигә ташлаш арқилиқ җимиқтурмақчи болған вә наһийә дәриҗилик сотқа бу һәқтә буйруқ чүшүргән, әмма вилайәтлик оттура сот мәһкимиси нурунгүлниң қилмишиниң җинайәт өлчимигә тошмайдиғанлиқини билдүрүп наһийилик сот һөкүмини рәт қилған.

Тәпсилатини юқиридики аваз улинишидин аңлиғайсиләр.

Пикирләр (0)
Share
Толуқ бәт