3 яшлиқ қутлуқҗанниң паҗиәлик өлүми

Чәтәлдин туғқан йоқлап үрүмчигә барған бир уйғурниң бизгә баян қилип беришичә, 7 - июл күнидики хитайларниң зораванлиқ вәқәсидә 3 яшлиқ бир уйғур бала хитайлар тәрипидин чанап өлтүрүветилгән.
Мухбиримиз ирадә
2009.09.29
Urumqi-7-iyulda-olturulgen-3-yashliq-Uyghur-balisi-305.jpg Радиомиз аңлиғучиси тәминлигән бу сүрәт, 2009 - йили 7- ийул күни, үрүмчиниң хитайлар көп олтурақлашқан "йовйүнси" дегән районида бир топ хитай лукчәклири тәрипидин вәхшийләрчә өлтүрүветилгән 3 йашлиқ қутлуқҗанниң вәқәдин кейинки җәсидиниң сүрити.
Радиомиз аңлиғучиси тәминлигән.

Зораван хитайлар тәрипидин вәһшийләрчә өлтүрүветилгән бу 3 яшлиқ нарәсидә балиниң исми қутлуқҗан болуп, вәқә күни кичик қутлуқ дадиси билән "йовйүнси" дәп аталған май тошуш ширкити районида кетиватқанда арқидин кәлгән бир топ хитайларниң һуҗумиға учриған икән.

Қоллирида қиңрақ - пичақ, тоқмақ көтүрүвалған бу хитайлар ата - бала иккисиниң башлириға раса уруп, чанашқа башлиған. Балиниң дадисиму таяқ зәрбисидин балисини қоғдап қелишқа амал қилалмиған. Зораван хитайлар 3 яшқа киргән бу нарәсидиниң қоллирини вә боюнлирини чаниған. Мана мушундақ бир пәйиттә вәқәни көргән бир топ уйғурлар йүгүрүп келип хитайларға қаршилиқ көрсәткән. Буниң билән балиниң дадиси қутулуп қалған. Әмма 3 яшлиқ қутлуқ болса боюн вә биликидики палта зәрбисидин бәхткә қарши җан үзгән.

Вәтән зияритидин қайтқан бу кишиниң бизгә баян қилип беришичә, хитай даирилири балиниң дадисиға өзлириниң балиниң қатилини чоқум тепип беридиғанлиқини вәдә қилған болсиму, әмма һазирғичә қатиллар техи қолға елинмиған. Қутлуқҗанниң җәситини дадиси қол телефон арқилиқ рәсимгә тартивалған болуп, униң рәсимини қутлуқҗанниң дадиси бизгә хәвәр йәткүзгән мәзкур радио аңлиғучимиз билән параңлашқанда бәргән икән.

Бу киши 7 - июл күни өлтүрүветилгән бундақ уйғурларниң интайин көплүкини , әмма хитайниң буларниң бириниму ашкарилимайватқанлиқини ейтти.

5 - Июл күнидики намайиш һәққидә түрлүк муназириләр давамлашмақта . Нурғун кишиләр тинчлиқ билән елип берилған бу намайишниң һөкүмәтниң өз қоли билән характерини өзгәртип, буни намайишчи уйғурларни бастурудиған пурсәткә айландурғанлиқини дейишмәктә.

Үрүмчидики мәлум бир сақчиханида ишләйдиған мәлум бир қораллиқ сақчиниң мәзкур радио аңлиғучимизға ейтип бәргәнлириму буни испатлап турмақта. Бу сақчиниң униңға ейтишичә, у күни сақчи даирилири намайиш болидиғанлиқидин аллиқачан хәвәр тапқан болуп, һөкүмәт даирилири вәқә күни уйғур сақчиларға пуқрачә кийинип, намайишчиларниң қатариға кирип хитайларни уруп қалаймиқанчилиқ чиқиришни буйруқ қилған икән.

Бу сақчиниң у кишигә баян қилип беришичә, кәчтә үрүмчиниң "чаңлеюән" дәп атилидиған райондики токлар пүтүнләй өчүрүлгәндин кейин, шу күни өлгән уйғурларниң җәсити көйдүрүлүп, көмүветилгән вә әтрап пүтүнләй түзлинип һечқандақ из қалдурулмиған.

Юқириқи баянлар чәтәлдә яшайдиған, әмма уруқ - туғқанлириниң бихәтәрликни нәзәрдә тутуп, өзиниң исмини вә туриватқан дөлитини ашкарилашни халимиған, июл айлирида үрүмчидә зиярәттә болған бир нәпәр уйғурниң 5 - вә 7 - июлдики вәқәләр һәққидә биваситә аңлиғанлири һәм игилигән учурлиридин ибарәттур.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.