3 Yashliq qutluqjanning paji'elik ölümi

Radiomiz anglighuchisi teminligen bu süret, 2009 - yili 7- iyul küni, ürümchining xitaylar köp olturaqlashqan "yowyünsi" dégen rayonida bir top xitay lukchekliri teripidin wexshiylerche öltürüwétilgen 3 yashliq qutluqjanning weqedin kéyinki jesidining süriti.

Zorawan xitaylar teripidin wehshiylerche öltürüwétilgen bu 3 yashliq nareside balining ismi qutluqjan bolup, weqe küni kichik qutluq dadisi bilen "yowyünsi" dep atalghan may toshush shirkiti rayonida kétiwatqanda arqidin kelgen bir top xitaylarning hujumigha uchrighan iken.

Qollirida qingraq - pichaq, toqmaq kötürüwalghan bu xitaylar ata - bala ikkisining bashlirigha rasa urup, chanashqa bashlighan. Balining dadisimu tayaq zerbisidin balisini qoghdap qélishqa amal qilalmighan. Zorawan xitaylar 3 yashqa kirgen bu naresidining qollirini we boyunlirini chanighan. Mana mushundaq bir peyitte weqeni körgen bir top Uyghurlar yügürüp kélip xitaylargha qarshiliq körsetken. Buning bilen balining dadisi qutulup qalghan. Emma 3 yashliq qutluq bolsa boyun we bilikidiki palta zerbisidin bextke qarshi jan üzgen.

Weten ziyaritidin qaytqan bu kishining bizge bayan qilip bérishiche, xitay da'iriliri balining dadisigha özlirining balining qatilini choqum tépip béridighanliqini wede qilghan bolsimu, emma hazirghiche qatillar téxi qolgha élinmighan. Qutluqjanning jesitini dadisi qol téléfon arqiliq resimge tartiwalghan bolup, uning resimini qutluqjanning dadisi bizge xewer yetküzgen mezkur radi'o anglighuchimiz bilen paranglashqanda bergen iken.

Bu kishi 7 - iyul küni öltürüwétilgen bundaq Uyghurlarning intayin köplükini , emma xitayning bularning birinimu ashkarilimaywatqanliqini éytti.

5 - Iyul künidiki namayish heqqide türlük munaziriler dawamlashmaqta . Nurghun kishiler tinchliq bilen élip bérilghan bu namayishning hökümetning öz qoli bilen xaraktérini özgertip, buni namayishchi Uyghurlarni basturudighan pursetke aylandurghanliqini déyishmekte.

Ürümchidiki melum bir saqchixanida ishleydighan melum bir qoralliq saqchining mezkur radi'o anglighuchimizgha éytip bergenlirimu buni ispatlap turmaqta. Bu saqchining uninggha éytishiche, u küni saqchi da'iriliri namayish bolidighanliqidin alliqachan xewer tapqan bolup, hökümet da'iriliri weqe küni Uyghur saqchilargha puqrache kiyinip, namayishchilarning qatarigha kirip xitaylarni urup qalaymiqanchiliq chiqirishni buyruq qilghan iken.

Bu saqchining u kishige bayan qilip bérishiche, kechte ürümchining "changléyu'en" dep atilidighan rayondiki toklar pütünley öchürülgendin kéyin, shu küni ölgen Uyghurlarning jesiti köydürülüp, kömüwétilgen we etrap pütünley tüzlinip héchqandaq iz qaldurulmighan.

Yuqiriqi bayanlar chet'elde yashaydighan, emma uruq - tughqanlirining bixeterlikni nezerde tutup, özining ismini we turiwatqan dölitini ashkarilashni xalimighan, iyul aylirida ürümchide ziyarette bolghan bir neper Uyghurning 5 - we 7 - iyuldiki weqeler heqqide biwasite anglighanliri hem igiligen uchurliridin ibarettur.

Yuqiridiki awaz ulinishidin, bu heqtiki melumatimizning tepsilatini anglaysiler.