Almatada shangxey hemkarliq teshkilatigha a'it muhim mesililer heqqide ilmiy muhakime yighini bolup ötti
2011.04.20

19-Aprél küni almatada qazaqistan jumhuriyiti bilim we pen ministirliqi pen komitéti süléyménof namidiki sherqshunasliq instituti we iqtisad institutining uyushturushi bilen “Shangxey hemkarliq teshkilati merkiziy asiyadiki köp tereplimilik öz-ara heriketlishishning istiqballiq méxanizmi süpitide: asasiy utuqlar we pa'aliyet mesililiri” mawzusida yumilaq üstel ilmiy muhakime yighini ötküzüldi.
Melumatlargha qarighanda, 1996-1997-yilliri xitay, rusiye, qazaqistan, tajikistan we qirghizistan teripidin qurulghan “Shangxey beshliki” herbiy sahediki ishenchni mustehkemlesh we chégra rayonida qoralliq küchlerni öz-ara qisqartish heqqide kélishimge qol qoyghan idi. 2001-Yili u öz terkibige özbékistanni qobul qilghandin kéyin “Shangxey hemkarliq teshkilati” bolup özgertilgen. Mezkur ilmiy muhakime yighinida körsitilishiche, bu xelq'araliq teshkilatning asasiy wezipiliri teshkilatqa eza döletler ara ishenchni we qoshnidarchiliqni kücheytishtin, ularning siyasiy, soda , iqtisad, ilmiy-téxnika we medeniyet saheliride netijilik hemkarlishishigha yardemlishishtin, rayondiki tinchliqni, bixeterlikni we turaqliqni birliship teminlesh we saqlashtin, démokratik, adil we orunluq yéngi xelq'araliq siyasiy we iqtisadi tertip ornitishqa intilishtin ibarettur.
Yighin mabeynide, shangxey hemkarliq teshkilatining merkiziy asiya boshluqidiki xelq'araliq teshkilat süpitide gé'osiyasi, iqtisadi we ijtima'iy asaslirini, uning on yil ichide érishken utuqliri we netijilirini, teshkilatning rayon xaraktéridiki bixeterlikni teminleshtiki, iqtisadiy we medeniy-xeyrixahliq hemkarliqini rawajlandurushtiki rolini, teshkilat we qazaqistanning milliy menpe'etlirini, qazaqistanning teshkilatqa re'islik qilishi: merkiziy asiyada tinchliqni, bixeterlikni we turaqliqni qollashtiki teshebbuslirini muhakime qilish közde tutulghan idi.
Muhakime yighinigha qazaqistan prézidénti yénidiki qazaqistan istratégiyilik tetqiqatlar instituti, qazaqistan jumhuriyiti birinchi prézidéntining fondi yénidiki dunyawi iqtisad we siyaset instituti, el farabi namidiki qazaq milliy uniwérsitéti yénidiki bixeterlik we hemkarliq mesililiri instituti, ijtima'iy mesililerni analiz qilish merkizining ijtima'iy fondi, xelq'araliq tijaret akadémiyisi, riskulof namidiki qazaq iqtisad uniwérsitéti, “Turan” uniwérsitéti, shundaqla qazaqistan jumhuriyiti tashqi ishlar ministirliqi, sheriqshunasliq we iqtisad institutlirining wekilliri, yétekchi tetqiqatchi-alimliri qatnashti.
Radi'omiz ziyaritini qobul qilghan ijtima'iy mesililerni analiz qilish merkizi ijtima'iy fondining mu'awin mudiri qanat béréntayéf mezkur ilmiy muhakime yighini heqqide öz qarashlirini otturigha qoydi.