Shayarda yüz bergen 29 ‏ - yanwar majirasining tepsiliy ehwali

Igileshlirimizdin qarighanda, nöwette shayar nahiyisidiki oyunchuqxanilarning xéridarliri asasen Uyghurlar؛ oyunxanining xojayin we bashqurghuchiliri bolsa pütünley xitaylar. Éliktronluq oyunchuqlardiki utush - utturush mesilisi ikki terep arisida dawamliq jédel - majralargha seweb bolmaqta.

Muxbirimiz shöhret hoshur
2009-02-03

Shendung uniwérsitétida oquwatqan bir nechche Uyghur oqughuchilarning, chingdaw shehiridiki melum xitay saqchi da'iriliri teripidin qattiq urulup arqidin tutqun qilin'ghan körünüsh.

Süret boxun.com Tor bétidin élindi. Neshriyat hoquqi boxun.com Ning.

u0203-pmx

Majiralar, saqchi xadimlirining oyunxana igilirige yan bésishi, ularni qoghdishi, Uyghurlarni bolsa tutush we bésishi bilen bir terep qilinmaqta. Netijide weqening siyasiy we milliy xaraktéri ashkarilanmaqta.

Bu qétim yüz bergen 29 ‏ - yanwar majirasi shayarda yéqinqi yillardin béri yüz bergen 10nechche qétimliq majiraning peqet birsi, hetta axirqisimu emes, shuningdin 3 kün kéyin ene eshu bazarda oxshash weqe yene bir qétim yüz bergen. Yene ikki neper Uyghur yarilinip doxturxanigha apirilghan.

Biz bügün 29 ‏ - yanwar majirasida eng éghir yarilan'ghan Uyghur yash sirajidin bilen söhbetleshtuq. U, eshu künidiki weqe jeryani heqqide bizge melumat berdi.

Shayardiki yerlik xelqtin ehwal igiliginimizde, oyunxana xojayinlirining Uyghur yashlirini kochidiki Uyghurlargha körsitip turup urghanliqini, sirttiki Uyghurlarning saqchigha xewer qilghanliqini, saqchilar yétip kelgende, oyunxana sahiplirining saqchilargha ishikni échip bermigenlikini, andin kochidiki Uyghurlarning hem saqchilargha hem oyunxana sahiplirigha naraziliq bildürüp, oyunxanigha tash - kések bilen hujum qilghanliqini we basturup kirgenlikini bildürdi.

Toluqsiz melumatlardin qarighanda, saqchilar shu küni etraptiki Uyghur jama'itini naraziliq bildürüshke chaqirghan nebijan dawut, enwer we ablikim qatarliq 3 neper yash, we yene ikki neper tijaretchini tutqun qilghan, shundaqla ulargha 15 künlük toxtitip qoyush jazasi bérilgen.

Naraziliq herikitide qanuniy dawa qilghuchilardin bolghan nebijan dawut bilen enwer aliy mektep oqughuchiliridur. Ular nöwette tutup turush ornida, ularning jazasining mana mushu 15 künlük toxtitish bilen tügeydighan - tugimeydighanliqi téxi melum emes.

Nöwette shayar xelqi jem'iyetke izchil weqe tughdurup bériwatqan oyunchuqxanilarni taqashni telep qilmaqta.

Bu programmimizda yene, 2 ‏ - ayning 1 ‏ - künidiki ikkinchi qétimliq majirada yarilan'ghan bir Uyghur yashning weqe toghrisida éytqanlirini silerge sunduq.

Yuqiridiki awaz ulinishidin, shayarda yüz bergen 29 ‏ - yanwar majirasi heqqide bergen xewirimizning tepsilatini anglaysiler.