Xitay siyasiy-qanun emeldari falunggung muritidin epu soridi

Yéqinda ulugh éra gézitide, xitaydiki 610-alahide saqchi etritige qarashliq bir sheher derijilik emeldarning 2 neper aka-uka falunggung muritigha ten jazasi yürgüzülgenlikini étirap qilghanliqi we bu aka-ukilardin epu sorighanliqi heqqide bir xet élan qilinip, xitay chong quruqluqi we chet'ellerde zor ghulghula peyda qildi.
Ixtiyariy muxbirimiz gülshen abduqadir
2012.11.07
Falungung-imza-toplash-paaliyiti-305 Süret, 2010 - yili 9 - ayning 18 - küni, falungongchilarning myunxéndiki ezaliri élip barghan "kompartiyidin chékinishke imza toplash" paaliyitidin körünüsh.
RFA Photo / Ekrem

Xitaydiki partiye merkizi komitétigha biwasite qaraydighan siyasiy qanun komitéti qarmiqidiki 610-alahide saqchi etritining jang zémin dewride mexsus falunggung muritlirigha qarita qattiq so'al-soraq qilish we ten jazasi élip bérish üchün qurulghanliqi melum. Sabiq xitay re'isi jang zémin falunggung muritlirining meshiq élip bérishini xitay chong quruqluqida chekligen shundaqla, falunggung muritlirigha qarita qattiq we rehimsizlerche basturush buyruqi chüshürgen xitay rehberlirining biri.

Xettin melum bolushiche, xitaydiki melum bir sheher derijilik falunggung muritlirini emgek bilen özgertish lagéridiki ondin artuq saqchi bu ikki neper aka-ukini 15 kün uxlatmastin so'al-soraq qilghan we ten jazasi bergen.

Hörmetlik radi'o anglighuchilar, xelq'ara kechürüm teshkilati qatarliq dunyadiki nopuzluq kishilik hoquq teshkilatliri xitay kommunist partiyisining 13 yildin buyan falunggung muritlirigha élip bériwatqan qiyin-qistaq we kishilik hoquq depsendichiliklirini izchil küntertipke qoyup, xitay hökümitini falunggung muritlirigha qaratqan zulumlirini toxtitishqa chaqiriwatidu. Undin bashqa xitay emeldarlirining yoshurun halda falunggung muritlirining organlirini sétish sodisi qiliwatqanliqigha a'it pakitlar arqa-arqidin pash qilinip, pütün dunyaning diqqiti xitaydiki falunggung muritlirining teqdirige buralmaqta.

Xitay, dunyadiki falunggung muritlirigha bolghan hésdashliq chuqanlirigha qilche perwa qilmay, ulargha nisbeten téximu qattiq qol mu'amile qiliwatqan bir peytte, tuyuqsiz xitaydiki bu saqchi emeldarining 2 neper aka-uka falunggung muritigha ten jazasi yürgüzülgenlikini étirap qilip, ulargha epu sorash xéti yézip axbarat saheside élan qilishi hemme ademni heyran qaldurdi.

Bu mesile heqqide toxtalghan xitay analizchiliridin lyu goxu'a mundaq deydu:
-Xitay kommunist partiyisi falunggung muritlirigha zulum qiliwatqanliqigha 13 yil boldi, emma bu tunji qétim 610-saqchi etritidiki xitay saqchi emeldarining falunggung muritlirigha nisbeten ten jazasi yürgüzgenlikini étirap qilishi we epu sorishi, yene kélip axbarat wasitiliri arqiliq epu sorishi bolup hésablinidu. Bu xitayda kommunist zulumning axirlishiwatqanliqining belgisi. Buninggha jang zémin we uning qolchomaqliri jawabkar. Jang zémin we bö shiley qatarliqlarning haman bir kün jinayi jawabkarliqqa tartilidighanliqigha ishenchim kamil.

Igileshlerge asaslan'ghanda, bu 2 neper falunggung muriti aka-ukilar, xitay kompartiyisining yuqiri derijilik emeldarlirining perzentliri iken.

Xitay analizchisi ka ren chang analiz yürgüzüp, ten jazasigha uchrighan bu ikki neper aka-ukining xitay kompartiyisidiki melum yuqiri derijilik emeldarning perzentliri bolghanliqi üchünla, saqchi terepning ten jazasi yürgüzgenlikini étirap qilishqa we epu sorashqa mejbur bolghanliqini, buning bilen kommunistik partiyining falunggung muritlirigha yürgüzüwatqan zulumning boshap qalmaydighanliqini bildürdi.

Xitay analizchiliridin ja sünma xitay hökümitining falunggung muritlirini basturush üchün intayin nurghun meblegh ajritiwatqanliqini bildürüp mundaq deydu:
-Xitay merkizi hökümiti özliri élan qilghan melumatlargha asaslan'ghanda, hökümet mexsus falunggung muritlirini basturush üchün qurulghan siyasiy qanun tarmaqlirining ichki qurulmisini küchlendürüsh we saqchilarni köpeytish üchün 100 milyard amérika dolliri serp qilghan bolup, eger bu iqtisadni xitay puqralirining saghlamliq sughurtisi we yaki yashan'ghanlarning pénsiyisi üchün ishletken bolsa, nurghunlighan xitay puqraliri xatirjem bolghan bolatti.
Hörmetlik radi'o anglighuchilar, xitay ölkiliride qurulghan siyasiy qanun tarmaqliri falunggung muritlirigha qarita basturush élip bériwatqan bolsa, Uyghur diyaridiki siyasiy qanun tarmaqliri Uyghur xelqini keng kölemlik halda basturush üchün xizmet qilmaqta. Uyghur diyaridiki weziyettin xewerdar kishilerning bildürüshiche, xitay hökümiti “Shinjangning muqimliqi hemmidin ela” sho'ari astida,siyasiy qanun tarmaqlirini mehelle we asasiy qatlamlarghiche kéngeytip Uyghur diyarini puqradin saqchi köp, haletke keltürüp qoyghanliqini we keng kölemlik qanunsiz tutqun qilishning ewj alghanliqini bildürmekte.
Yuqiridiki ulinishtin bu programmining tepsilatini anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.