'Муһәббәтниң 10 шәрти' хитайниң 60 йиллиқ чоң тәбрик күни тәйвәндә қоюлидиған филим, дәп муқимланди

Тәйвән филим фестивали рабийә қадир һәққидики һөҗҗәтлик филимни, хитай коммунист һөкүмитиниң қарши турғанлиқи билән әмәлдин қалдурмайдиғанлиқини җакарлиди. Тәйвәндә һазир бу филим һәққидә чоң дағдуға қозғалди, тәйвән даирилиригә қаритилған тәнқитму күчлүк.
Мухбиримиз вәли
2009-09-21
Share
Rabiye-xanim-Filim-festiwal-zalida-tamashibinlar-bilen-305.jpg Рабийә қадир ханим австралийә зийаритини ғәлибилик ахирлаштурғандин кейин, америкиға қайтиш алдида мухбиримизниң зийаритини қобул қилип, австиралийә һөкүмити вә хәлқигә миннәтдарлиқ билдүрди. Сүрәт, рабийә ханимниң 8 - авғуст күни, "муһәббәтниң 10 шәрти" намлиқ филим қйулған залда филимни көргили кәлгән австиралийә тамашибинлири арисида һайаҗанлиқ көрүнүшлиридин бири.
www.theepochtimes.com Дин елинди. (Paul Crock/AFP/Getty Images)

Уйғур миллий һәрикитиниң рәһбири рабийә қадир ханим һәққидики һөҗҗәтлик филимниң бүгүн тәйвәндә қоюлушқа башлиғанлиқидин башқа, бу филимни 'хитайниң 60 йиллиқ чоң тәбрик күни тәйвәндә қоюлидиған филим' дәп муқимланғанлиқи, бүгүнки әң чоң йеңи хәвәр болуп қалди.

'Муһәббәтниң 10 шәрти' бүгүн тәйвәндә қоюлишқа башлиди

Ройтерс агентлиқиниң тәйбейдин баян қилишичә, хитай һөкүмитиниң үрүмчидә йүз бәргән уйғур қозғилиңиға риясәтчилик қилди, дәп әйибләватқан уйғур рәһбири рабийә қадир ханимниң кәчүрмишлири тәсвирләнгән 'муһәббәтниң 10 шәрти' намлиқ һөҗҗәтлик филим, тәйвәндә филим фестивалидин бирай бурун, йигирмә иккинчи сентәбир күни алдинала қоюлушқа башлиған. Бу филим һазир тәйвәндә чоң дағдуға қозғаватиду. Бүгүнки еланлардин мәлум болушичә, бу филим әтә төт қетим қоюлидикән.

Беләт елиш үчүн сәп болуп турған кишиләргә беләт йетишмиди

Мәркизи агентлиқиниң гавшоңдин баян қилишичә, 'муһәббәтниң 10 шәрти' дегән 59 минутлуқ филим, бүгүн гавшоңда үч қетим қоюлди. Һәр қетимда, беләт елиш үчүн сәп болуп турған кишиләргә беләт йетишмиди.

23 ‏- Числаниң белитиму бүгүн пүтүнләй сетилип болди. Мәдәнийәт мәркизиниң хизмәтчилири һазир беләт заказ қилидиған кишиләрдин келиватқан телефонларни елишқа үлгүрәлмәйватиду.

Бу филимни дағдуға қиливатқан кишиләр тәйвән даирилирини тәнқидлиди

Бүгүн тәйбей аһалилиридин яң фамилилик бир ханимниң бу филим һәққидә тәйвәндә болуватқан вәқәләрни сөзләп беришичә, тәйвән филим фестивалиға талланған 'муһәббәтниң 10 шәрти' дегән филим тәйвән фестивалиға талланған филим тизимликидин чиқириветилмигән, бәлки тәйвәндә бүгүн алдин ‘ала қоюлушқа башлиған.

Бу филим тәйвәндә наһайити чоң дағдуға қозғиған. Бу филимни көрүшкә алдираватқан кишиләр тәйвән даирилирини ' немә үчүн күтүпханилардила қойисән? ' дәп тәқидләп наразилиқ билдүрүшкә башлиған.

'Шинхуа агентлиқи' ялған ейтти

Әмма, 'шинхуа агентлиқи' бүгүн гавшоңдин тарқатқан хәвиридә, гавшоң шәһири һазир җәмийәтниң бесими астида қелип, пиланини өзгәртип, келәр айда фестивалда қоюшқа пиланланған 'муһәббәтниң 10 шәрти' дегән филимни күтүпханидила қоюп аяқлаштурмақчи болған иди, тәйвән хәлқиниң қаттиқ тәнқидигә учриди, дәп баян қилди.

Гавшоң шәһириниң шәһәр башлиқи бу филим 'шәһримиздә очуқ қоюлиду' дәп җакарлиди

Мәркизи агентлиқиниң бүгүн кәч елан қилған әң йеңи хәвиридә баян қилинишичә, гавшоң шәһириниң шәһәр башлиқи чен чу, бүгүн шәһәрлик парламентта, "муһаҗирәттики уйғур рәһбири рабийә қадирниң кәчүрмишлири тәсвирләнгән 'муһәббәтниң 10 шәрти' намлиқ һөҗҗәтлик филим шәһримиздә очуқ қоюлиду. Бу филим шәһиримизниң әркинлик вә демократик тәрәққияти үчүн пайдилиқ. Шәһиримиз гәрчә саяһәт шәһири болсиму, әмма шәһиримизниң ишлири саяһәтчиләргә беқинип қалмайду. Биз бу филимниң тәсирини 7‏- айниң 24 ‏- күни мелборн филим фестивалида көрдуқ" дәп җакарлиған.

Тәйвән мәдәнийәт мәркизиниң башлиқи ву сәйпиң бүгүн җәмийәткә йәнә, хитай пүтүн күчи билән әйибләватқан уйғур рәһбири рабийә қадирниң кәчүрмишлири тәсвирләнгән 'муһәббәтниң 10 шәрти' дегән бу филим 'хитайниң 60 йиллиқ чоң тәбрик күни тәйвәндә қоюлидиған филим' дәп, җакарлиди.

Тәйвәнликләр уйғурларни чүшәнмәйтти ...

Немә үчүн рабийә ханим һәққидики һөҗҗәтлик филим тәйвәндә бу қәдәр дағдуға қозғиди? дегән соалимизға җаваб бәргән, һазир тәйвәндә туруватқан мустәқил язғучи лин бавхуа ниң чүшәндүрүшичә, тәйвәнликләр уйғурларни чүшәнмәйтти. Бәлки хитай һөкүмити уйғурларни бәк көп қарилап, әйибләп кәтти. Гәрчә, тәйвәнликләр, дунядики башқа дөләт хәлқлиригә охшаш, коммунист партийә яман дегән адәмни яман адәм әмәс, дәп қарисиму, әмма йәнила уйғурларни обдан чүшәнмәйтти. 'Муһәббәтниң 10 шәрти' дегән һөҗҗәтлик филим тәйвәнликләргә һәқиқий рабийә ханимни көрситип қойди.
 
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт