Йәнә 2 нәпәр тибәтликниң сақчилар тәрипидин етип өлтүрүлүши җиддий инкас қозғиди

23 - январ сичүәндики наразилиқ намайишида яриланған 2 нәпәр тибәтликниң 9 - феврал күни етип өлтүрүлүши хәлқарада җиддий инкас қозғиди. Чәтәлләрдики тибәт тәшкилатлири дуня җамаәтчиликини тибәт вәзийитигә диққәт қилишқа чақирди.
Мухбиримиз меһрибан
2012.02.10

Чәтәлләрдики тибәт тәшкилатлири хәлқара мәтбуатларда баянат елан қилип, дуня җамаәтчиликини сичүән тибәтләр районида йүз бәргән икки нәпәр тибәтликниң хитай қораллиқ сақчилири тәрипидин етип өлтүрүлүш вәқәсигә һәм тибәтләр районида давамлишиватқан тибәт раһиблириниң өзини өлтүрүвелиш вәқәлиригә диққәт қилишқа чақирди.

Радиомиз тибәт бөлүми игилигән учурлардин мәлум болушичә, пәйшәнбә күни сичүәнниң гәнзи области луху наһийисидики 40 яшлиқ тибәт раһиби йесхе ригсал вә униң 38 яшлиқ иниси йесхе самдруб мөкүвалған тағ арисида хитай қораллиқ әскәрлири тәрипидин етип ташланған.

Мәркизи һиндистандики тибәт сүргүн һөкүмити хадиминиң радиомиз тибәт бөлүмигә билдүрүшичә, раһиб йесхе ригсал 23 - январ күни гәнзи областида йүз бәргән хитай һөкүмитигә қарши намайишта сақчиларниң оқи тегип еғир яриланған. Намайиштин кейин йесхе ригсал иниси йесхе самдруб билән бирликтә тағ арисиға кирип мөкүнгән. 9 - Феврал күни улар қоллирида һечқандақ қаршилиқ көрситиш қорали болмиған әһвалда қораллиқ сақчилар тәрипидин қоршивелинип етип ташланған.

Ундин башқа, 8 - феврал күни чүштин кейин чиңхәй өлкисиниң юлсул наһийисидики лаб ибадәтханисиниң йәнә бир раһиби өзигә от қоювалғандин кейин, сақчи даирилири уни көйүп яриланған һаләттә тутуп кәткән. Мәлум болушичә, бу бултурдин буян өзигә от қоювалған 22 - тибәт раһиби икән.

Тибәт сүргүн һөкүмити нөвәттики тибәт вәзийитиниң җиддийлики һәққидә баянат берип, хәлқара кишилик һоқуқ тәшкилатлири һәм ғәрб демократик дөләтлирини тибәт вәзийитигә көңүл бөлүшкә чақирди. Тибәт сүргүндики һөкүмитиниң тәшәббуси билән дуняниң һәрқайси җайлиридики тибәтләр пүтүн йәр шари бойичә шам йеқип дуа қилиш кечилики өткүзүп, 23 - январ сичүәндә йүз бәргән тибәтләрниң наразилиқ намайишида етип өлтүрүлгән тибәтликләр һәм бултурдин буян өзигә от қоювелиш арқилиқ қаршилиқини ипадиләп өлүп кәткән тибәтликләрни хатирилиди.

Мәлум болушичә 8 - феврал кечиси нюйорк шәһириниң манхатен мәйданида өткүзүлгән шам йеқип хатириләш кечиликигә тибәт һәрикитини қоллииғучи америкилиқлар вә башқа кишилик һоқуқ тәшкилатлири қатнашқан.

Тибәт сүргүндики һөкүмити бүгүн бәргән баянатида, түнүгүн сичүәнниң гәнзи областида тибәтликләрни етип өлтүрүш вәқәсини әйиблиди. Тибәт сүргүндики һөкүмити йәнә бу йил 23 - феврал тибәтләрниң йеңи йил байрими һәм 10 - март тибәт қозғилиңиниң 53 йиллиқ хатирә күни йетип келиш алдида, хитай даирилириниң қораллиқ әскәрлирини тибәтләр районида техиму көпәйтип, тибәттә йәнә бир қетимлиқ зор көләмлик бастуруш елип беришқа тәйярлиниватқанлиқини тәкитлиди һәмдә дуня җамаитидин нөвәттики тибәт вәзийитигә диққәт қилип, йәниму көплигән тибәтләрниң зиянкәшликкә учришиниң алдини елишни тәләп қилди.

Хитай даирилири 2012 - йили 23 - январ сичүәндә йүз бәргән тибәтләрниң наразилиқ һәрикитидин кейин, вәқәни чәтәлләрдики далай лама тәрәпдарлириниң қутратқулуқ қилиши билән йүз бәргән бөлгүнчилик һәрикити дәп әйиблигән һәмдә тибәтләр олтурақлашқан районларда қораллиқ әскәрләрни көпәйтип, районда қаттиқ бихәтәрлик тәдбирлири елип баридиғанлиқини билдүргән иди. Әмма тибәтләрниң хитай һөкүмитигә қарши наразилиқ һәрикәтлириниң тохтимаслиқи, район вәзийитини техиму җиддийләштүрүп, хәлқара мәтбуатларниң тибәт вәзийитигә болған диққитини тартмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.