Торонтода һүсәйин җелилни тәләп қилиш, ванковерда олимпиккә наразилиқ билдуруш намайиши өткүзүлди

Хитай даирлириниң олимпик мәзгилидиму, канада пуқраси һүсәйин җелилни вә уйғур сиясий мәһбусларни йәнила турмида тутуп туруватқанлиқиға шундақла уйғурларниң кишилик һоқуқлирини еғир һалда дәпсәндә қиливатқанлиқиға наразилиқ билдүрүш үчүн, җүмә күни кәчтә, канаданиң торонто шәһридики уйғурлар, бу шәһәрдики хитай консулханисиниң алдида намайиш елип барди вә хитай консулханисидин һүсәйин җелилни қоюветишни тәләп қилди.
Мухбиримиз камил турсун хәвири
2008.08.11
Toronto-namayish-080808-305 8 - Авғуст, канада хитай консулханиси алдида елип берилған олимпиккә наразилиқ билдуруш намайишидин бир көрүнүш.
RFA Photo / Kamil Tursun

 Намайишқа уйғурлардин башқа йәнә канададики "иҗтимаий адаләт" тәшкилатиниң әзалири қатнашти.

Ванковердики бейҗиң олимпик мусабиқисигә наразилиқ билдүрүш паалийәтлири давам қилмақта.Һәр саһәдин болған нәччә йүзлигән киши қатнашқан шәнбә күнидики намайишта уйғур вәкилигә сөз қилиш пурсити берилди.

Канада уйғур җәмийитиниң рәиси руқийә ханим җүмә күни кәчтә, торонтодики хитай баш консулханиси алдида өткүзүлгән,канада пуқраси һүсәйин җелилниң икки йилдин бери,хитайда қанунсиз тутуп турулушиға наразилиқ билдүрүш паалийити һәққидә мәлумат бәрди.

Руқийә ханимниң билдүрүшичә, намайишчилар хитай консулханисидин һүсәйин җелилни қоюветишни вә униң тәқдири һәққидә мәлумат беришни тәләп қилған болсиму, әмма хитай консулхана хадимлири намайишчилар билән йүз көрүшүштин өзини қачурған. Ванковерда уйғурларни өз ичигә алған хитай һөкүмитигә қарши бирләшмә наразилиқ намайиши шәнбә күни 3 - күнигә қәдәм қойди.

Канада уйғур җәмийитиниң һәйәт әзаси өмәрҗан әпәнди, ванковерда өткүзүлүватқан паалийәтләрни тонуштурди. Шәнбә күнидики чоң намайишта сөз қилиш пурситигә еришкән өмәрҗан әпәнди, олимпик мусабиқисини өткүзүш һоқуқини хитай һөкүмитигә беришниң инсанийәт тарихидики хаталиқ икәнликини вә хитай даирлириниң олимпик баһанисида, уйғурларни бастурушни күчәйткәнликини алаһидә тәкитлигән.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.